કોંગ્રેસ તરફથી રાહુલ જ PM પદના ઉમેદવારઃ ગેહલોત

ચર્ચા: રાજસ્થાનના CMની મહાગઠબંધનની મીટિંગ અગાઉ મહત્વની જાહેરાત

- 

દેશમાં લોકસભા ચૂંટણી 2024માં વિપક્ષ તરફથી વડાપ્રધાનપદના ઉમેદવાર કોણ હશે, તેને લઈને ટૂંકમાં જ ઈન્ડિયા ગઠબંધનની ત્રીજી બેઠક મુંબઈમાં યોજાવાની છે. આ બેઠક પૂર્વે રાજસ્થાનના મુખ્યમંત્રી અશોક ગહેલોતે એક મહત્વનું નિવેદન આપીને રાજકીય વર્તુળોમાં હલચલ મચાવી દીધી છે. અશોક ગેહલોતે જણાવ્યું છે કે કોંગ્રેસ પાર્ટી તરફથી લોકસભાની 2024ની ચૂંટણી માટે વડાપ્રધાન પદના ઉમેદવાર માટે રાહુલ ગાંધીનું નામ નક્કી છે. આ માહિતી અશોક ગેહલોતે ખાનગી ન્યૂઝ ચેનલના એક કાર્યક્રમમાં કહી છે. આ સાથે ઈન્ડિયા ગઠબંધનને લઈને કહ્યું કે લોકોએ એવી પરિસ્થિતિ પેદા કરી, જેના પરિણામ સ્વરુપ વિપક્ષી દળોએ એકસંપ થઈને ગઠબંધન કરવું પડ્યું છે. દેશની વર્તમાન સ્થિતિએ ભાજપનો સામનો કરવા માટે 26 પાર્ટીઓને એકસંપ કરી દીધી છે.