Dowe kultuur ingesluit in viering van Afrikaans

Saterdagoggend se aanbieding deur die ATKV-tak Sommer Net Ons van Pacaltsdorp om gebaretaal onder die loep te plaas, was 'n onvergeetlike ervaring wat die horende gehoor 'n openbarende kykie gebied het in die leefwêreld van gehoorgestremdes.

- Alida de Beer

Marnitz Steyn (links) en mondskilder Patrick Botto gesels tydens pouse.

Die program is aangebied in samewerking met DeafSA en die George-munisipaliteit as deel van Sommer Net Ons se Hande Praat Afrikaans-projek.

Toe taklid Ruzanne van Beulen nog op die skoolbanke in Robertson was, het haar skool se uniforms dieselfde spot ontlok as dié van die skool vir dowes in Worcester omdat dit baie eenders was. Dit bly haar tot vandag toe by en het die begeerte in haar wakker gemaak om wanpersepsies op te klaar en inklusiwiteit vir gehoorgestremdes te bevorder.