Pacs-man sê arrestasie was 'n fout

'n Inwoner van Pacaltsdorp, Ernest Damons, beweer dat hy onregmatig deur sommige lede van die Pacaltsdorp-polisie gearresteer en aangehou is, wat ernstige trauma vir hom en sy gesin veroorsaak het.

- Kristy Kolberg

Volgens Damons is hy op Vrydag 15 Augustus by sy woning in Moeggeploeg in hegtenis geneem.

Damons sê die polisie het hom meegedeel dat daar 'n lasbrief vir sy arrestasie was, maar dat hierdie lasbrief nooit aan hom of sy vrou gewys is nie. Hy beweer ook dat die polisie hom beveel het om saam te gaan sonder om sy regte te verduidelik.

Hy sê by die Pacaltsdorp-polisiekantoor is sy besonderhede aangeteken, en hy het die nag alleen in 'n sel deurgebring. Hy sê hy het vir sy lewe gevrees, aangesien hy 'n sleutelgetuie is in 'n saak van beweerde onwettige uitsetting teen twee senior polisiebeamptes.