ஐ.நா. கூட்டம்: பாலஸ்தீன அதிபருக்கு அமெரிக்கா தடை

அமெரிக்காவின் நியூயார்க் நகரில் அடுத்த மாதம் நடைபெறவிருக்கும் ஐ.நா. பொதுச் சபை கூட்டத்தில் பாலஸ்தீன அதிபர் மஹ்மூத் அப்பாஸ் பங்கேற்பதற்கு அந்த நாடு தடை விதித்துள்ளது.

- 

வாஷிங்டன், ஆக. 30:

இஸ்ரேல் மற்றும் தங்களின் கடும் எதிர்ப்பை மீறி அந்தக் கூட்டத்தில் பாலஸ்தீனத்துக்கு தனி நாடு அந்தஸ்து அளிக்கவிருப்பதாக பிரான்ஸ், கனடா, பிரிட்டன், ஆஸ்திரேலியா உள்ளிட்ட 15 நாடுகள் தெரிவித்துள்ள சூழலில், அதைத் தடுக்கும் வகையில் அமெரிக்கா இந்த அறிவிப்பை வெளியிட்டுள்ளது.

இது குறித்து அமெரிக்க வெளியுறவுத் துறை வெளியிட்டுள்ள அறிக்கையில் தெரிவிக்கப்பட்டுள்ளதாவது: பாலஸ்தீன விடுதலை அமைப்பு (பிஎல்ஓ) மற்றும் பாலஸ்தீன ஆணையத்தைச் சேர்ந்த மஹ்மூத் அப்பாஸ் உள்ளிட்ட 80 பேருக்கு விசா மறுக்கப்பட்டுள்ளது. அமைதி முயற்சிகளை பாதிக்கும் வகையில் அவர்கள் செயல்படுவதாக அமெரிக்கா கருதுகிறது.

அமெரிக்க வெளியுறவுத் துறை அமைச்சர் மார்கோ ரூபோ கூறுகையில், 'ஐ.நா. பொதுச் சபை கூட்டத்துக்காக அமெரிக்கா வர விசா மறுக்கப்பட்டுள்ளவர்கள், பாலஸ்தீன பிரச்னைக்கு தீர்வு காண்பதற்கான முயற்சிகளைக் குலைக்கும் வகையில் அரை குறையான ஒரு பாலஸ்தீனத்தை தனி நாடாக அங்கீகரிக்க வேண்டும் என்று கோருகின்றனர்' என்று குற்றஞ்சாட்டினார்.