மாநிலங்களவைத் தேர்தல்: திமுக-அதிமுக வேட்பாளர்கள் மனு தாக்கல்

போட்டியின்றி தேர்வாக வாய்ப்பு

- 

சென்னை, ஜூன் 6: மாநிலங்களவைத் தேர்தலில் போட்டியிடும் திமுக, அதிமுக வேட்பாளர்கள் வெள்ளிக்கிழமை மனு தாக்கல் செய்தனர். காலியாகவுள்ள ஆறு இடங்களுக்கு, திமுக சார்பில் 3 பேரும், அதிமுக தரப்பில் 2 பேரும், மக்கள் நீதி மய்யம் கட்சி சார்பில் ஒருவரும் வேட்புமனுக்களை அளித்துள்ளனர். இந்த வேட்புமனுக்கள் அனைத்தும் சரியான முன்மொழிவுகளுடன் இருக்கும்பட்சத்தில் போட்டியின்றி ஆறு பேரும் தேர்வு செய்யப்படுவது உறுதியாகும்.

தமிழகத்தில் ஜூலை மாதம் காலியாகவுள்ள 6 மாநிலங்களவை உறுப்பினர் இடங்களுக்கான வேட்புமனு தாக்கல் கடந்த திங்கள்கிழமை தொடங்கியது. முன்னதாக, தேர்தலில் போட்டியிட திமுக சார்பில் பி.வில்சன், ரொக்கையா மாலிக் (எ) சல்மா, எஸ்.ஆர்.சிவலிங்கம் ஆகியோரும், திமுக ஆதரவுடன் மக்கள் நீதி மய்யம் சார்பில் அந்தக் கட்சியின் தலைவர் கமல்ஹாசனும் வேட்பாளர்களாக அறிவிக்கப்பட்டிருந்தனர்.