வாக்காளர் அட்டை - ஆதார் இணைப்பு: தேர்தல் ஆணையம் ஆலோசனை

வெவ்வேறு மாநிலங்களில் உள்ள பலருக்கு ஒரே மாதிரி வாக்காளர் அடையாள எண் வழங்கப்பட்ட விவகாரம் சர்ச்சையாகி உள்ள நிலையில், வாக்காளர் அடையாள அட்டையுடன் ஆதார் எண்ணை இணைப்பது குறித்து அரசு உயர் அதிகாரிகளுடன் தேர்தல் ஆணையம் ஆலோசிக்க முடிவு செய்துள்ளது.

- 

புது தில்லி, மார்ச் 15:

இதற்காக, மத்திய உள்துறைச் செயலர், சட்டத் துறைச் செயலர் மற்றும் இந்திய தனி அடையாள ஆணைய (யுஐடிஏஐ) தலைவர் ஆகியோருடன் தலைமைத் தேர்தல் ஆணையர் ஞானேஷ் குமார் வரும் செவ்வாய்க்கிழமை (மார்ச் 18) ஆலோசனை மேற்கொள்ள உள்ளார் என்று தேர்தல் ஆணைய வட்டாரங்கள் தெரிவித்தன.

அண்மையில் நடைபெற்ற மாநில சட்டப்பேரவைத் தேர்தல்களில், கடைசி நேரத்தில் புதிதாக ஆயிரக்கணக்கானோர் வாக்காளர் பட்டியலில் சேர்க்கப்பட்டதாக காங்கிரஸ் உள்ளிட்ட எதிர்க்கட்சிகள் புகார் தெரிவித்தன. இந்த புகார்களை தேர்தல் ஆணையம் மறுத்தது.

இந்நிலையில், வெவ்வேறு மாநிலங்களில் உள்ள சிலருக்கு ஒரே மாதிரியான வாக்காளர் அடையாள எண்கள் வழங்கப்பட்டிருப்பது, நாடு முழுவதும் பெரும் பரபரப்பை ஏற்படுத்தியுள்ளது.