இந்தியாவின் விண்வெளி நாயகன் சுபான்ஷு சுக்லா!

சர்வதேச விண்வெளி நிலையத்தில் இருந்து ஆய்வுத் தரவுகள் மட்டுமன்றி இந்தியாவின் எதிர்கால விண்வெளி லட்சியங்களையும் கனவுகளையும் சுமந்து பூமிக்கு திரும்பியுள்ளார் நாட்டின் விண்வெளி நாயகன் சுபான்ஷு சுக்லா.

- 

புது தில்லி/லக்னெள, ஜூலை 15:

39 வயதாகும் இவர், இந்திய விமானப் படை குரூப் கேப்டன் மற்றும் விமான செயல்பாட்டு பரிசோதனை விமானி ஆவார். இஸ்ரோ மற்றும் நாசா ஆதரவிலான ஆக்ஸியம்-4 திட்டத்தின்கீழ் சர்வதேச விண்வெளி நிலையத்தில் 18 நாட்கள் தங்கியிருந்த சுக்லா உள்ளிட்ட 4 வீரர்களும், தங்களின் பயணத்தை வெற்றிகரமாக நிறைவு செய்து, பாதுகாப்பாக பூமியை வந்தடைந்துள்ளனர்.

இந்தியாவைப் பொறுத்தவரை இது திருப்புமுனையான பயணமாகும். ஏனெனில், சர்வதேச விண்வெளி நிலையத்துக்கு சென்ற முதல் இந்திய வீரர் சுபான்ஷு சுக்லா தான்; கடந்த 1984-ஆம் ஆண்டில் ரஷிய விண்கலத்தில் விண்வெளிக்குச் சென்ற இந்திய வீரர் ராகேஷ் சர்மாவுக்குப் பிறகு விண்வெளிக்கு பயணித்த 2-ஆவது இந்திய வீரர் இவர்.

நடுத்தரக் குடும்பத்தில் பிறந்தவர்: உத்தர பிரதேச மாநிலம், லக்னெளவில் கடந்த 1985-இல் நடுத்தரக் குடும்பத்தில் பிறந்தவர். இவரது குடும்பத்தில் யாரும் விமானப் படையிலோ அல்லது விண்வெளித் துறையிலோ பணியாற்றவில்லை.