நாகை, மயிலாடுதுறையில் மக்கள் குறைதீர் கூட்டம்

நாகை மாவட்ட ஆட்சியர் அலுவலகத்தில் திங்கள்கிழமை நடைபெற்ற மக்கள் குறைதீர்க்கும் நாள்கூட்டத்தில், மாற்றுத்திறனாளிகளுக்கு பல்வேறு நலத்திட்ட உதவிகளை ஆட்சியர் ப. ஆகாஷ் வழங்கினார்.

- 

நாகப்பட்டினம், ஜூன் 16:

இக்கூட்டத்துக்கு, மாவட்ட ஆட்சியர் ப. ஆகாஷ் தலைமை வகித்தார். கூட்டத்தில், வங்கிக் கடன், உதவித்தொகை உள்ளிட்ட பல்வேறு கோரிக்கைகளை முன்வைத்து மொத்தம் 295 மனுக்கள் பெறப்பட்டன. இம்மனுக்கள் மீது விரைந்து நடவடிக்கை மேற்கொள்ள அலுவலர்களுக்கு ஆட்சியர் உத்தரவிட்டார்.

முன்னதாக, மாற்றுத்திறனாளிகள் நலத்துறை சார்பில் 8 பேருக்கு தலா ரூ.6,359 வீதம் ரூ.50,872 மதிப்பிலான தையல் இயந்திரங்கள், 2 செவித்திறன் குறையுடைய மாற்றுத்திறனாளிகளுக்கு தலா ரூ.3,000 வீதம் காதொலிக் கருவிகள், பார்வைத்திறன் குறையுடைய மாற்றுத்திறனாளி ஒருவருக்கு ரூ.25,000 மதிப்பிலான டெயிசி பிளேயர் என மொத்தம் 11 பயனாளிகளுக்கு ரூ.81,872 மதிப்பிலான நலத்திட்ட உதவிகளை மாவட்ட ஆட்சியர் வழங்கினார்.