பாகிஸ்தானை கேள்விகளால் துளைத்த ஐ.நா. பாதுகாப்பு கவுன்சில்

'பஹல்காம் தாக்குதலில் பாகிஸ்தான் பயங்கரவாதிகளுக்குத் தொடர்புள்ளதா?, அணு ஆயுத மிரட்டல் விடுப்பது மோதலை மேலும் தீவிரப்படுத்தாதா? உள்ளிட்ட கடுமையான கேள்விகளை ஐ.நா.பாதுகாப்பு கவுன்சில் பாகிஸ்தானிடம் எழுப்பியுள்ளது.

- 

நியூயார்க், மே 6:

இந்தியா-பாகிஸ்தான் இடையே அதிகரித்து வரும் போர்ப்பதற்றம் குறித்து திங்கள்கிழமை ஆலோசனை நடத்திய ஐ.நா. பாதுகாப்பு கவுன்சில், பதற்றத்தைத் தணிக்க அழைப்பு விடுத்தது.

ஜம்மு-காஷ்மீரின் பஹல்காமில் 26 பேர் கொல்லப்பட்ட கொடூர பயங்கரவாத தாக்குதலைத் தொடர்ந்து, பாகிஸ்தானுக்கு எதிரான பதிலடிக்கு இந்தியா தயாராகி வருகிறது.

தேசிய பாதுகாப்பு ஆலோசகர், முப்படைத் தலைமைத் தளபதி உள்ளிட்டோருடன் பிரதமர் மோடி தொடர் கலந்தாலோசனையில் ஈடுபட்டுள்ளார். நாடு முழுவதும் முக்கிய மாவட்டங்களில் புதன்கிழமை போர்க்கால பாதுகாப்பு ஒத்திகையை மேற்கொள்ள மாநிலங்களுக்கு மத்திய அரசு அறிவுறுத்தியுள்ளது.

இந்நிலையில், இந்தியாவுடன் நீடித்து வரும் பதற்றம் குறித்து விவாதிக்க ஐ.நா.பாதுகாப்பு கவுன்சில் சிறப்புக் கூட்டத்துக்கு அந்த அமைப்பின் தற்போதைய நிரந்தர மற்ற உறுப்பு நாடான பாகிஸ்தான் கோரிக்கை விடுத்தது. பாதுகாப்பு கவுன்சிலின் மே மாத தலைமைப் பொறுப்பில் உள்ள கிரீஸ், பாகிஸ்தானின் கோரிக்கையை ஏற்று திங்கள்கிழமை சிறப்புக் கூட்டத்தை நடத்தியது.

தாக்குதலுக்கு கண்டனம்: சுமார் ஒன்றரை மணிநேரம் நடைபெற்ற இந்தக் கூட்டத்தில், இந்தியா-பாகிஸ்தான் சூழ்நிலைகுறித்து மத்திய கிழக்கு, ஆசியா மற்றும் பசிபிக் பகுதிகளுக்கான அமைதி நடவடிக்கைகள் துறையின் உதவி பொதுச் செயலர் துனிசியாவைச் சேர்ந்த கலீத் முகமது கியாரி விளக்கினார்.