நாட்டின் வளர்ச்சி வேகம் பெறும்

‘அடுத்த தலைமுறை சரக்கு - சேவை வரி (ஜிஎஸ்டி) சீர்திருத்தங்கள், நாட்டின் வளர்ச்சிப் பயணத்துக்கு வேகமூட்டும்; தொழில் புரிவதை எளிதாக்கி, முதலீடுகளை மேலும் ஈர்க்கும்' என்று பிரதமர் நரேந்திர மோடி ஞாயிற்றுக்கிழமை தெரிவித்தார்.

- 

‘ஜிஎஸ்டி குறைப்பின் மூலம் மக்கள் தங்கள் கனவுகளை எளிதாக பூர்த்தி செய்ய முடியும்' என்றும் அவர் குறிப்பிட்டார்.

நாட்டில் நான்கு விகித ஜிஎஸ்டி முறையை மாற்றி, இரண்டு விகித (5%, 18%) ஜிஎஸ்டி முறை திங்கட்கிழமை (செப். 22) முதல் அமலாகிறது.

சுமார் 375 பொருள்கள் மீதான வரிக் குறைப்பால், தினசரி பயன்பாட்டுப் பொருள்கள் தொடங்கி கார்கள் வரை விலை குறைக்கப்பட்டுள்ளது.

இதை முன்னிட்டு, நாட்டு மக்களுக்கு பிரதமர் மோடி ஞாயிற்றுக்கிழமை மாலை 5 மணிக்கு உரையாற்றினார். தனது 19 நிமிஷ உரையில், அவர் கூறியதாவது:

நாட்டு மக்கள் அனைவருக்கும் நவராத்திரி விழா நல்வாழ்த்துகள். நவராத்திரியின் தொடக்கத்தில், தற்சார்பு தேசம் எனும் இலக்கை எட்ட மிகப் பெரிய மற்றும் முக்கியமான அடியை எடுத்து வைக்கிறது இந்தியா. திங்கட்கிழமை சூர்யோதயத்துடன் அடுத்த தலைமுறை ஜிஎஸ்டி சீர்திருத்தங்களும் அமலாகின்றன.

ஜிஎஸ்டி 'சேமிப்புத் திருவிழா' தொடங்குகிறது. இதன்மூலம் மக்கள் தாங்கள் விரும்பும் பொருள்களை எளிதாக வாங்க முடியும். வீடு கட்டுதல், தொலைக்காட்சி, குளிர்சாதனங்கள், மோட்டார் சைக்கிள், கார் வாங்குதல் போன்ற கனவுகள் நிறைவேறும்.