ஊராட்சிகளின் சுதந்திரமான செயல்பாடு!

ஊராட்சிகள் சுதந்திரமாகச் செயல்படுகின்றனவா? ஊராட்சித் தலைவர்கள் உள்ளிட்ட நிர்வாகிகள் தங்கள் கடமையை உணர்ந்து செயல்படுகிறார்களா? உண்மையில் மக்கள் பணி செய்ய முன்வந்த உள்ளாட்சி நிர்வாகிகள் நிலை என்ன? இவையெல்லாம் இப்போது ஆழ்ந்து சிந்திக்கக் கூடியவை ஆகிவிட்டன. மக்களுக்கு அருகிலேயே உள்ள ஆட்சி அமைப்புதான் ஊராட்சி. ஆனால், உண்மையில் மக்களின் கைகளில் அந்த அதிகாரம் உள்ளதா என யாரைக் கேட்டாலும் இல்லை என்றுதான் பதில் சொல்வார்கள். ஏன் இந்த நிலை?

- எம்.டி. அஜய்குமார்

இந்திய ஜனநாயகத்தின் இதயமாகத் திகழ்பவை தான் கிராம ஊராட்சிகள். இந்த இதயத்துக்குக் குருதியாய் இருந்து வழி நடத்துபவை பஞ்சாயத்து ராஜ் சட்டம். பஞ்சாயத்து ராஜ் அமைப்பு, கடந்த 30 ஆண்டுகளில் நாடு முழுவதும் கிராமங்கள் வளர்ச்சி பாதையில் பயணிக்கக் காரணமாக அமைந்துள்ளது என்ற போதிலும், இந்நாளில் நாம் ஒரு முக்கியமான கேள்வியை எழுப்ப வேண்டியுள்ளது:

ஊராட்சிகள் உண்மையில் சுதந்திரமாகச் செயல்படுகின்றனவா? அல்லது மத்திய மாநில அரசுகளும், அரசியல் கட்சிகளும் அவற்றின் சுதந்திர செயல்பாட்டுக் காக உண்மையிலேயே கடமையாற்றுகின்றனவா அல்லது கடிவாளமாக முட்டுக் கட்டை இடுகின்றனவா என்று கேட்டால், உண்டு ஆனால் இல்லை என்றுதான் பதில் சொல்ல வேண்டும்.

1993-ஏப்ரல் 24-இல் 73-ஆவது அரசியலமைப்புத் திருத்தம் கொண்டு வரப்பட்டு மத்திய அரசால் டுத்த வேண்டும் என்ற சுய நடைமுறைப்படுத்தப்பட்டதோடு, 1994-இல் தமிழ்நாட்டில் ஊராட்சிகள் சட்டம் இயற்றப்பட்டது. மக்கள் நேரடியாகத் தேர்தலின் மூலமாக ஊராட்சித் தலைவர்களையும் உறுப்பினர்களையும் தேர்ந்தெடுக்கிறார்கள். ஆனால், நிறைய ஊராட்சிகளில் தீர்மானங்களை நிறைவேற்றுதல், நிதி செலவுகளைத் திட்டமிடுதல், திட்டங்களைச் செயல்படுத்துதல் ஆகியனவற்றை எல்லாம் தாமாகவே செய்ய முடியாத சூழல்தான் இருக்கிறது.