புதின்-டிரம்ப் பேச்சு: ரஷியா, உக்ரைன், அமெரிக்கா நிலைப்பாடு என்ன?

உக்ரைன் போர் நிறுத்தம் தொடர்பாக ரஷிய அதிபர் புதினுடன் அமெரிக்க அதிபர் டிரம்ப் ஆகஸ்ட் 15-ஆம் தேதி நேரடிப் பேச்சுவார்த்தை நடத்தவுள்ள நிலையில், இந்த விவகாரத்தில் ரஷியா, உக்ரைன், அமெரிக்கா மூன்று நாடுகளுமே வெவ்வேறு நிலைப்பாட்டை கொண்டுள்ளன.

- 

கீவ், ஆக. 10:

போர் நிறுத்தம் தொடர்பாக அச்சுறுத்தல்கள், அழுத்தங்கள், இறுதி எச்சரிக்கைகள் வந்துபோனபோதிலும், உக்ரைன் போர் மூலம் எட்டவேண்டிய இலக்குகளில் ரஷிய அதிபர் புதின் எந்த சமரசமும் செய்துகொள்ளவில்லை.

இந்நிலையில், உக்ரைனுக்கு சாதகமற்ற ஒப்பந்தத்தை ஏற்குமாறு அந்நாட்டை கட்டாயப்படுத்துவதற்கான வாய்ப்பாக அமெரிக்க அதிபர் டிரம்ப் புடனான சந்திப்பை புதின் பயன்படுத்திக்கொள்ளக் கூடும் என்ற கருத்து எழுந்துள்ளது. இச்சூழ்நிலையில் அமெரிக்காவின் அலாஸ்காவில் நடைபெறவுள்ள டிரம்ப்- புதின் சந்திப்பு பெரும் எதிர்பார்ப்பை ஏற்படுத்தியிருக்கிறது.

ரஷியாவின் நிலைப்பாடு

கடந்த ஜூன் மாதம் இஸ்தான்புல்லில் நடைபெற்ற அமைதிப் பேச்சுவார்த்தையில், 30 நாள் போர் நிறுத்தத்துக்கு இரண்டு வழிகளை உக்ரைனிடம் ரஷியா முன்வைத்தது. 2022-ஆம் ஆண்டு ரஷியா சட்டவிரோதமாக இணைத்துக் கொண்ட உக்ரைனின் டொனட்ஸ்க், லுஹான்ஸ்க், ஸபோரிஷியா, கர்சான் ஆகிய பகுதிகளில் இருந்து உக்ரைன் படைகளைத் திரும்பப் பெற வேண்டும் என்பது முதல் வழி.