மீண்டும் பயங்கரவாத முகாம்கள்

பாகிஸ்தான் கட்டமைப்பதாக உளவுத்துறை தகவல்

- 

புது தில்லி, ஜூன் 28: இந்தியாவின் 'ஆபரேஷன் சிந்தூர்' நடவடிக்கை மூலம் தாக்கி அழிக்கப்பட்ட பயங்கரவாத முகாம்கள் மற்றும் ராணுவத் தளங்களை மறுகட்டமைப்பு செய்யும் பணிகளை பாகிஸ்தான் தீவிரப்படுத்தியுள்ளதாக தகவல்கள் வெளியாகியுள்ளன.

பாகிஸ்தான் ராணுவம், அந் நாட்டின் உளவு அமைப்பான ஐஎஸ்ஐ மற்றும் பாகிஸ்தான் அரசு இந்த மறுகட்டமைப்புக்குத் தேவையான நிதியுதவி உள்பட பிற உதவிகளையும் வழங்குவது உளவுத்துறை தகவல்கள் மூலம் தெரியவந்துள்ளது.

ஜம்மு-காஷ்மீரின் பஹல்காமில் கடந்த ஏப்ரல் 22-ஆம் தேதி சுற்றுலாப் பயணிகள் மீது பயங்கரவாதிகள் நடத்திய கொடூர தாக்குதலில் 26 பேர் உயிரிழந்தனர். இதைத் தொடர்ந்து, பாகிஸ்தான் மற்றும் பாகிஸ்தான் ஆக்கிரமிப்பு காஷ்மீர் பகுதிகளில் அமைந்திருந்த பயங்கரவாத முகாம்கள் மீது 'ஆபரேஷன் சிந்தூர்' நடவடிக்கை மூலம் இந்தியா தாக்குதல் நடத்தியது.

இதில் ஜெய்ஷ்-ஏ-முகமது, லஷ் கர்-ஏ-தொய்பா, ஹிஸ்புல் முஜாஹிதீன், தி ரெஸிஸ்டன்ஸ் ஃபிரன்ட் உள்ளிட்ட பயங்கரவாத அமைப்புகளுக்குச் சொந்தமான 9 முகாம்கள் தகர்க்கப்பட்டன.

இந்தத் தாக்குதலைத் தொடர்ந்து, இந்தியாவின் எல்லைப் பகுதிகள் மீது ஆளில்லா விமானங்கள் (ட்ரோன்) மற்றும் சிறியரக ஏவுகணைகளை வீசி பாகிஸ்தான் தாக்குதல் நடத்தியது.