ஈரானுக்கு இருக்கும் வழிகள்!

ஈரான் கடந்த பல்லாண்டுகளாக உள்நாட்டிலும், பிராந்தியம் முழுவதும் பல அடுக்கு ராணுவத் தளங்களை கட்டமைத்து வருகிறது. ஈரான் மீது அமெரிக்கா தாக்குதல் நடத்துவதை இவை தடுத்து வந்தன. இந்நிலையில், இஸ்ரேலுடனான ஈரானின் மோதல் அமெரிக்காவின் நிலைப்பாட்டில் மாற்றத்தை ஏற்படுத்தியுள்ளது.

- 

துபை, ஜூன் 22:

ஈரானின் ராணுவ மற்றும் அணுசக்தி தளங்கள் மீது இஸ்ரேல் கடந்த ஜூன் 13-ஆம் தேதி எதிர்பாராத தாக்குதலைத் தொடங்கியது. பிராந்தியத்தில் ஒரே அணுசக்தி நாடாக திகழும் இஸ்ரேல், ஈரான் அணு ஆயுத மேம்பாட்டை அச்சுறுத்தலாக கருதுகிறது.

இஸ்ரேலுக்கு ஈரானும் தக்க பதிலடி தந்த நிலையில், இரு தரப்பிலும் தீவிர மோதல் மூண்டது. இச்சூழலில், ஈரானின் 3 முக்கிய அணுசக்தி தளங்கள் மீது அமெரிக்கா 'பி2 ஸ்பிரிட்' ரக விமானங்கள் மூலம் வெடிகுண்டுகளை வீசி தாக்குதல் நடத்தியுள்ளது. இந்த மோதலை ஈரான் இத்துடன் நிறுத்திக்கொள்ளாவிட்டால், கடுமையான பேரழிவைச் சந்திக்க நேரிடும் என்றும் அமெரிக்கா எச்சரித்துள்ளது.

இதனையும் மீறி அமெரிக்கா, இஸ்ரேல் மற்றும் அதன் பிராந்திய நட்பு நாடுகளுக்கு எதிராக பதிலடியைத் திட்டமிட்டால், இஸ்ரேல் போன்ற தொலைதூர இலக்குகளைத் தாக்குவதை விட, அருகிலுள்ள அமெரிக்க தளங்களைத் தாக்குவதையே எளிதாகவும், பயனுள்ளதாகவும் ஈரான் காணக்கூடும்.

ஈரானைவிட அமெரிக்காவும் இஸ்ரேலும் வலுவான ராணுவ வலிமையைக் கொண்டுள்ளன. ஆனால், சமீபத்திய வரலாற்றில் இப்பிராந்தியத்தில் அவை எப்போதும் தீர்மானமாக நிரூபிக்கப்படவில்லை.

எனவே, மத்திய கிழக்கு நாடுகளில் உள்ள அமெரிக்க படைகள் மீதான தாக்குதல், ஹோர்முஸ் நீரிணை மூலம் உலகளாவிய எண்ணெய் விநியோகத்தைத் தடை செய்யும் முயற்சி, அமெரிக்காவின் தாக்குதலையடுத்து எச்சரிப்பதைக் கொண்டு அணு ஆயுதம் உருவாக்கும் முயற்சியைத் தொடர்ந்து முன்னெடுத்துச் செல்வது ஆகியவற்றில் ஒன்றுதான் ஈரானின் அடுத்தகட்ட நடவடிக்கையாக இருக்கும் என்று எதிர்பார்க்கப்படுகிறது. ஈரானின் எந்தவொரு திட்டமும் ஏற்படுத்தக் கூடிய பாதிப்புகள் என்னவாக இருக்கும் என்பதை விரிவாக காணலாம்.

ஹோர்முஸ் நீரிணை: பாரசீக வளைகுடாவின் குறுகிய வாயிலான ஹோர்முஸ் நீரிணை, உலகளாவிய எண்ணெய் விநியோகத்தில் சுமார் 20 சதவீதத்தைக் கையாள்கிறது.