கண்ணகி-முருகேசன் ஆணவப் படுகொலை வழக்கில் 11 பேருக்கு ஆயுள்

உறுதி செய்தது உச்சநீதிமன்றம்

- நமது சிறப்பு நிருபர்

நமது சிறப்பு நிருபர் புது தில்லி, ஏப். 28: தமிழகத்தைச் சேர்ந்த கண்ணகி-முருகேசன் தம்பதியை 2003-இல் ஆணவப் படுகொலை செய்த வழக்கில் 11 குற்றவாளிகளுக்கு விதிக்கப்பட்ட ஆயுள் சிறைத் தண்டனையை உச்சநீதிமன்றம் திங்கள்கிழமை உறுதிப்படுத்தியது. இந்த விவகாரத்தில் தங்களுக்கு விதிக்கப்பட்ட தண்டனையை எதிர்த்து சிறைக்கைதிகள் கந்தவேல், ஜோதி, மணி ஆகியோர் தாக்கல் செய்த மேல்முறையீட்டு மனுக்களையும் உச்சநீதிமன்றம் தள்ளுபடி செய்தது.

கடலூர் மாவட்டம் விருத்தாசலம் அருகே புதுக்கூரைப்பேட்டையைச் சேர்ந்த கண்ணகி, முருகேசன் ஆகியோர் 2003-இல் ஜாதி மறுப்புத் திருமணம் செய்து கொண்டனர். பின்னர், கிராம மக்கள் முன்னிலையில் இந்த தம்பதிக்கு பெண்ணின் தந்தை, சகோதரர் மற்றும் சிலர் விஷம் கொடுத்துக் கொன்றதாக விருத்தாசலம் காவல் துறை வழக்குப் பதிவு செய்தது.

இந்த வழக்கில் கொலை செய்யப்பட்ட முருகேசனின் தந்தை சாமிக் கண்ணு சென்னை உயர்நீதிமன்றத்தில் வழக்குத் தொடர்ந்தார். அதில் வழக்கை சிபிஐ விசாரணைக்கு மாற்றி உயர்நீதிமன்றம் உத்தரவிட்டது. இதையடுத்து, கண்ணகியின் தந்தை துரைசாமி, சகோதரர் மருதுபாண்டியன், அவர்களின் உறவினர்கள் உள்பட 15 பேர் மீது சிபிஐ வழக்குப் பதிவு செய்தது.