தொடரும் முதியோர் கொலை!

தமிழகத்தில் தனியே வசிக்கும் முதியோர் பல்வேறு காரணங்களுக்காக கொல்லப்படுவது அதிகரித்து வருவது சமூக ஆர்வலர்களிடையே கவலையை ஏற்படுத்தி உள்ளது.

- 

திருப்பூர் மாவட்டம், பல்லடம் அருகே சேமலைக்கவுண்டம்பாளையம் கிராமத்தில் தெய்வசிகாமணி (78), மனைவி அலமேலு (74), மகன் செந்தில்குமார் (44) ஆகியோர் கடந்த ஆண்டு நவம்பர் 28-ஆம் தேதி அடித்துக் கொல்லப்பட்டனர். தொழில்நுட்பம் வளர்ந்து விட்ட இந்தக் காலகட்டத்தில் 250-க்கும் மேற்பட்ட சிசிடிவி கேமரா பதிவுகளை ஆய்வு செய்து ஐந்து மாதங்களுக்குப் பின்னரே இந்த வழக்கில் இப்போது துப்பு துலக்கப்பட்டுள்ளது.

இந்தப் பரபரப்பு அடங்குவதற்குள், ஈரோடு மாவட்டம், சிவகிரி அருகே உள்ள விளக்கேத்தி மேகரையான்தோட்டத்தில் தனியே வசித்து வந்த ராமசாமி (72), மனைவி பாக்கியம் (63) தம்பதி கடந்த ஏப். 28-ஆம் தேதி கொலை செய்யப்பட்டு பத்தே முக்கால் பவுன் நகைகள் கொள்ளையடிக்கப்பட்டன. இந்த இரண்டு கொலைகள் தொடர்பாக ஈரோடு மாவட்டம், அறச்சலூரைச் சேர்ந்த மூன்று பேர் கடந்த ஞாயிற்றுக்கிழமை (மே 18) கைது செய்யப்பட்டுள்ளனர்.

சேலம் ஜாகீர்அம்மாபாளையத்தில் மளிகைக் கடை நடத்திவரும் பாஸ்கரன் (70), மனைவி வித்யா (65) ஆகியோர் கடந்த மே 11-ஆம் தேதி பட்டப்பகலில் அவர்களது வீட்டிலேயே வைத்து அடித்துக் கொலை செய்யப்பட்டுள்ளனர். இவர்களைக் கொன்று 10 பவுன் நகையைக் கொள்ளை அடித்ததாக பிகார் மாநிலத்தைச் சேர்ந்த சந்தோஷ் என்பவர் கைது செய்யப்பட்டுள்ளார்.