ஆதிக்கமற்ற சமுதாயத்தை அமைப்போம்: முதல்வர் மு.க.ஸ்டாலின் உறுதி

ஆதிக்கமற்ற சமத்துவ சமுதாயத்தை அமைப்போம் என்று முதல்வர் மு.க. ஸ்டாலின் உறுதிபடத் தெரிவித்தார்.

- 

சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் நடைபெற்ற தாயுமானவர் திட்டம், கல்வி, சுயதொழில் மற்றும் அரசு நலத்திட்ட உதவிகள் வழங்கும் விழாவில் பங்கேற்று அவர் பேசியதாவது: எல்லாருக்கும் எல்லாம் கிடைக்க வேண்டும். எல்லோரும் சமமாக வாழுகின்ற சமத்துவ சமுதாயம் அமைய வேண்டும். என்பதுதான் லட்சியம். ஆட்சிப் பொறுப்புதான் அந்த லட்சியங்களை திட்டங்கள் மூலம் வென்றெடுப்பதற்கான வழியாகும்.

அதனால்தான் சமூக நலத் திட்டங்கள் பலவற்றை செயல்படுத்தி, விளிம்பு நிலையில் இருக்கிற மக்களையும் முன்னேற்றம் அடையச் செய்கிறோம். திராவிட மாடல் அரசின் வரலாற்றிலேயே இல்லாத அளவுக்கு ஆதிதிராவிடர் மற்றும் பழங்குடியினர் மேம்பாட்டுக்காக ஏராளமான திட்டங்களைச் செயல்படுத்திக் கொண்டிருக்கிறோம்.