உத்தரகண்ட் நிலச்சரிவு: தொடரும் மீட்புப் பணி

உத்தரகண்ட் மாநிலம், உத்தரகாசி மாவட்டத்தில் மேகவெடிப்பால் ஏற்பட்ட வெள்ளப்பெருக்கு மற்றும் நிலச்சரிவால் பாதிக்கப்பட்ட பகுதிகளில் தொடர்ந்து மூன்றாவது நாளாக மீட்புப் பணிகள் வியாழக்கிழமையும் நீடித்தது.

- 

டேராடூன், ஆக. 7: உத்தரகண்ட் மாநிலம், உத்தரகாசி மாவட்டத்தில் மேகவெடிப்பால் ஏற்பட்ட வெள்ளப்பெருக்கு மற்றும் நிலச்சரிவால் பாதிக்கப்பட்ட பகுதிகளில் தொடர்ந்து மூன்றாவது நாளாக மீட்புப் பணிகள் வியாழக்கிழமையும் நீடித்தது.

அதன்படி, 274 பேர் பாதுகாப்பாக மீட்கப்பட்டதாகவும், 9 ராணுவ வீரர்கள் உள்பட 59 பேர் இன்னும் கண்டறியப்படவில்லை என்றும் தெரிவிக்கப்பட்டுள்ளது.

கடந்த செவ்வாய்க்கிழமை பிற்பகலில் மேகவெடிப்பால் உத்தரகாசி-கங்கோத்ரி வழித்தடத்தில் அமைந்த தராலி மற்றும் அதைச்சுற்றியுள்ள கிராமங்களில் திடீர் சரிவு ஏற்பட்டது. மலைச்சரிவில் அமைந்த ஏராளமான வீடுகள் மண்ணில் புதைந்தன. இந்தப் பேரிடரில் 4 பேர் உயிரிழந்துள்ளதாக அதிகாரிகள் தெரிவித்திருந்த நிலையில், இடிபாடுகளுக்குள் சிக்கியிருந்த 2 உடல்கள் புதன்கிழமையன்று மீட்கப்பட்டன.

மூன்றாவது நாளான வியாழக்கிழமை வானிலை சற்று சீரடைந்ததைத் தொடர்ந்து, விமானப் படை ஹெலிகாப்டர்கள் மூலம் 274 பேர் பத்திரமாக மீட்கப்பட்டுள்ளனர்.