வங்கதேசம்: சிறுபான்மையினர் மீதான தாக்குதல்களுக்கு வகுப்புவாதம் காரணமல்ல

இடைக்கால அரசு அறிக்கை

- 

'வங்கதேசத்தில் 2025-ஆம் ஆண்டில் நிகழ்ந்த ஹிந்துக்கள் உள்ளிட்ட சிறுபான்மையினர் மீதான தாக்குதல் சம்பவங்களில் பெரும்பாலானவற்றுக்கு வகுப்புவாதம் (மதவாதம்) காரணம் அல்ல' என்று அங்கு ஆட்சி செய்யும் தலைமை ஆலோசகர் முகமது யூனுஸ் தலைமையிலான இடைக்கால அரசு சார்பில் திங்கள்கிழமை வெளியிடப்பட்ட அறிக்கையில் தெரிவிக்கப்பட்டுள்ளது.

'வங்கதேசத்தில் சிறுபான்மையினர் மீதான திட்டமிட்ட தாக்குதல்களைத் தடுக்க உறுதியான விரைவான நடவடிக்கையை இடைக்கால அரசு மேற்கொள்ள வேண்டும் என்று இந்தியா தரப்பில் கடந்த 9-ஆம் தேதி வலியுறுத்தப்பட்ட நிலையில், இந்த விளக்கத்தை வங்கதேச அரசு வெளியிட்டுள்ளது.

முகமது யூனுஸின் ஊடகப் பிரிவு சார்பில் வெளியிடப்பட்ட இந்த அறிக்கையில் மேலும் கூறியிருப்பதாவது:

காவல் துறையின் குற்றப் பதிவு ஆவணங்களை ஆய்வு செய்ததில், 2025-ஆம் ஆண்டு ஜனவரி முதல் டிசம்பர் மாதம் வரையிலான காலகட்டத்தில் வங்கதேசத்தில் சிறுபான்மையின சமூகத்தினர் மீது மொத்தம் 645 தாக்குதல் சம்பவங்கள் பதிவு செய்யப்பட்டுள்ளன. இந்தச் சம்பவங்கள் அனைத்தும் மிகுந்த கவலைக்குரியவை என்றபோதிலும், விரிவான ஆதாரங்கள் மற்றும் தாக்குதலுக்கான நோக்கங்களுடன் இந்த வழக்குகளை காவல் துறை பதிவு செய்துள்ளது. அதன்படி, இந்தத் தாக்குதல்களில் பெரும்பாலானவை, குற்றப் பின்னணியின் கீழ் நிகழ்ந்தவையாகும். வகுப்புவாதத்துக்கும் இந்தத் தாக்குதல்களுக்கும் தொடர்பில்லை எனத் தெரியவந்துள்ளது.