இந்திய பொருளாதாரத்தை முழுமையாகப் பாதிக்கும்: ராகுல்

இந்திய பொருள்கள் மீது அமெரிக்கா அறிவித்துள்ள பரஸ்பர வரி விதிப்பு நாட்டின் பொருளாதாரத்தை முழுமையாக சீரழிக்கும் அபாயம் உள்ளது; மேலும், இந்திய நிலப்பரப்பில் 4,000 சதுர கி.மீ. பரப்புக்கு மேல் சீனா எடுத்துக்கொண்டுள்ளது. இந்த விவகாரங்கள் தொடர்பாக மத்திய அரசு பதிலளிக்க வேண்டும் என்று எதிர்க்கட்சித் தலைவர் ராகுல் காந்தி வலியுறுத்தினார்.

- 

புது தில்லி, ஏப்.3:

மக்களவையில் வியாழக்கிழமை நடைபெற்ற கேள்வி நேரத்தின்போது ராகுல் பேசியதாவது: இந்தியாவின் நிலப்பரப்பில் 4,000 சதுர கி.மீ. பரப்பளவை சீனா ஆக்கிரமித்துள்ளது. இந்தச் சூழலில், இரு நாடுகளிடையேயான தூதரக உறவின் 75-ஆம் ஆண்டு நிறைவு கொண்டாட்டம் என்ற பெயரில், சீன தூதருடன் இணைந்து மத்திய வெளியுறவுச் செயலர் விக்ரம் மிஸ்ரி கேக் வெட்டி கொண்டாடிய காட்சி அதிர்ச்சியளித்தது.

2020-ஆம் ஆண்டில் கல்வான் பள்ளத்தாக்கில் சீன வீரர்களின் அத்துமீறிய தாக்குதலில் 20 இந்திய ராணுவ வீரர்கள் வீரமரணம் அடைந்தனர். இதற்காகத்தான், சீனாவுடன் இந்தியா கேக் வெட்டி கொண்டாடப்பட்டது?

இதுதொடர்பாக சீனர்களுக்கு குடியரசுத் தலைவரும், பிரதமரும் கடிதம் எழுதியதும் சீன தூதர் கூறியதன் மூலம் தெரியவந்தது. சீனாவுடன் சுமுக உறவை ஏற்படுத்த முயற்சிப்பதை எதிர்க்கவில்லை. ஆனால், அதற்கு முன்பாக எல்லையில் முன்பிருந்த நிலை ஏற்பட வேண்டும். சீனா ஆக்கிரமித்துள்ள நிலப்பரப்பை நாம் திரும்பப் பெற வேண்டும்.