மத்திய அரசுக்கு ஆக்கபூர்வ ஒத்துழைப்பு

நீதி ஆயோக் கூட்டத்தில் முதல்வர் விஜய்

- நமது நிருபர்

மத்திய அரசுக்கு ஆக்கபூர்வ ஒத்துழைப்பை தமிழக அரசு வழங்கும் என்று பிரதமர் மோடி தலைமையில் வியாழக்கிழமை நடைபெற்ற நீதி ஆயோக் கூட்டத்தில் முதல்வர் ஜோசப் விஜய் உறுதியளித்தார்.

மேலும், நீட் தேர்வு முறை கூடாது, தமிழகத்துக்கான கல்வி நிதி ரூ.3,284 கோடியை விடுவிக்க வேண்டும் உள்ளிட்ட கோரிக்கைகளையும் அவர் முன்வைத்தார்.

தில்லியில் உள்ள குடியரசுத் தலைவர் மாளிகை கலாசார மையத்தில் பிரதமர் நரேந்திர மோடி தலைமையில் அனைத்து மாநில முதல்வர்கள், துணைநிலை ஆளுநர்கள் பங்கேற்ற நீதி ஆயோக் 11-ஆவது கூட்டம் வியாழக்கிழமை நடைபெற்றது. இதில் பங்கேற்ற முதல்வர் ஜோசப் விஜய் பேசியதாவது:

மத்திய அரசுடன் ஆக்கபூர்வமான ஒத்துழைப்புடன் செயல்படுவதற்கு தமிழக அரசு உறுதிபூண்டுள்ளது. 2047-க்குள் வளர்ச்சியடைந்த இந்தியாவை உருவாக்குவதற்கான நமது அர்ப்பணிப்பை அடிக்கோடிட்டுக் காட்டும் வகையில், 2036-ஆம் ஆண்டுக்குள் 1.5 டிரில்லியன் டாலர் பொருளாதாரமாக உயர்வதற்கு தமிழ்நாடு பணியாற்றி வருகிறது.

கல்வி, திறன் மேம்பாடு, புத்தாக்கம், வேலைவாய்ப்பு ஆகிய துறைகளில் தமிழ்நாடு தொடர்ந்து முதலீடு செய்யும். ஆண்டுதோறும் 5 லட்சம் இளைஞர்களுக்கு உதவித்தொகையுடன் கூடிய பணியிடைப் பயிற்சிகள் மற்றும் தொழில் துறையுடன் இணைந்த திறன் பயிற்சிகளை வழங்கும் 'இளைஞர் திறன் மற்றும் வேலைவாய்ப்பு இயக்கத்தைச் செயல்படுத்த விழைகிறேன்.