ஆடிப்பெருக்கு: காவிரியில் புனித நீராடல்; கோயில்களில் சிறப்பு வழிபாடு

நாமக்கல் மாவட்டத்தில் ஆடிப்பெருக்கையொட்டி பொதுமக்கள் காவிரியில் நீராடி, கோயில்களில் சிறப்பு வழிபாடு நடத்தினர்.

- 

நாமக்கல்/ பரமத்தி வேலூர், ஆக. 3: ஆடிப்பெருக்கு விழாவையொட்டி கொல்லிமலை அறப்பளீஸ்வரர் கோயிலில் நடைபெற்ற சுவாமி திருக்கல்யாணத்தில் ஏராளமான பக்தர்கள் கலந்து கொண்டு வழிபட்டனர். காவிரி கரைகளிலும், மாவட்டத்தில் உள்ள முக்கிய கோயில்களிலும் பக்தர்களின் கூட்டம் அதிகரித்து காணப்பட்டது.

நாமக்கல் மாவட்டம் கொல்லிமலையில் ஒவ்வொரு ஆண்டும் ஆடிப்பெருக்கு விழா கோலாகலமாக கொண்டாடப்படும். வல்வில் ஓரி விழாவுடன், ஆடிப்பெருக்கு விழாவும் சேர்ந்து கொண்டாடப்படுவதால் கொல்லிமலையில் உள்ள பழங்குடியின மக்கள் உள்ளூர் திருவிழாபோல புத்தாடை அணிந்து கோயில்களுக்கு சென்று வழிபாடு செய்வர். அந்த வகையில் நிகழாண்டில் ஞாயிற்றுக்கிழமை ஆடிப்பெருக்கு விழா கொண்டாடப்பட்டது.

அறப்பளீஸ்வரர் கோயிலில் சனிக்கிழமை இரவு சுவாமிக்கு திருக்கல்யாணம் நடைபெற்றது. அதன்பிறகு ஞாயிற்றுக்கிழமை காலை சுவாமிக்கு நல்லெண்ணெய், சிகைக்காய், பால், தயிர், மஞ்சள், சந்தனம் போன்றவற்றால் அபிஷேகமும், சிறப்பு அலங்காரமும் நடைபெற்றது.

பிற்பகல் 3 மணியளவில் அறப்பளீஸ்வரர் உடனுறை அறம்வளர்த்த நாயகி அம்பாள், கங்காதேவி, சோமாஸ்கந்தர் வீதி உலா, தீர்த்தவாரி உற்சவம் உள்ளிட்டவை நடைபெற்றன. கொல்லிமலையை சுற்றியுள்ள ஏராளமான பழங்குடியின மக்கள், பல்வேறு மாவட்டங்களில் இருந்தும் வந்திருந்த சுற்றுலாப் பயணிகள் வழிபாடு மேற்கொண்டனர்.