விமான விபத்து: உயிரிழப்பு 265-ஆக உயர்வு

பிரதமர் நரேந்திர மோடி நேரில் ஆய்வு

- 

அகமதாபாத், ஜூன் 13: நாட்டையே உலுக்கிய அகமதாபாத் விமான விபத்தில் உயிரிழந்தோர் எண்ணிக்கை 265-ஆக உயர்ந்தது. அடையாளம் தெரியாத அளவில் உருக்குலைந்த உடல்களின் மரபணு சோதனைப் பணிகள் முடுக்கிவிடப்பட்டுள்ளன. இதுவரை 6 பேரின் உடல்கள் அடையாளம் காணப்பட்டு குடும்பத்தினரிடம் ஒப்படைக்கப்பட்டுள்ளன.

தனது சொந்த மாநிலமான குஜராத்தில் பெருந்துயர் நேரிட்ட இடத்தை பிரதமர் மோடி வெள்ளிக்கிழமை நேரில் பார்வையிட்டு ஆய்வு மேற்கொண்டார். காயமடைந்தோரை சந்தித்து நலம் விசாரித்த அவர், உயரதிகாரிகளுடன் ஆலோசனை மேற்கொண்டார்.

அகமதாபாத் சர்தார் வல்லபாய் படேல் சர்வதேச விமான நிலையத்தில் இருந்து ஏர் இந்தியா நிறுவனத்துக்கு சொந்தமான போயிங் 787 ட்ரீம்லைனர்ரக விமானம் (ஏஐ 171), வெளிநாட்டினர் உள்பட 242 பேருடன் (12 ஊழியர்கள், 230 பயணிகள்) லண்டனுக்கு வியாழக்கிழமை பிற்பகலில் புறப்பட்டது.