ஐசிஏஆர் முன்னாள் தலைவர் மர்ம மரணம்; காவிரி ஆற்றில் சடலமாக மீட்பு

இந்திய வேளாண் ஆராய்ச்சி கவுன்சில் (ஐசிஏஆர்) முன்னாள் தலைமை இயக்குநரும் பத்மஸ்ரீ விருதாளருமான சுப்பண்ணா ஐயப்பனின் (70) உடல் கர்நாடக மாநிலத்தில் உள்ள ஸ்ரீரங்கபட்டினம் காவிரி ஆற்றில் மீட்கப்பட்டதாக போலீஸார் தெரிவித்தனர்.

- 

மாண்டியா, மே 11:

முன்னதாக, காவிரி ஆற்றில் சடலம் ஒன்று மிதந்து வந்ததாக அந்தப் பகுதியில் வசிக்கும் பொதுமக்கள் போலீஸாருக்கு தகவல் தெரிவித்தனர். இதையடுத்து, சம்பவ இடத்துக்கு விரைந்த போலீஸார் அதனை மீட்டனர். அது சுப்பண்ணா ஐயப்பனின் உடலெனத் தெரியவந்தது.

இதுகுறித்து கர்நாடக மாநில போலீஸார் கூறுகையில், 'காவிரி ஆற்றங்கரையில் ஐயப்பனின் இருசக்கர வாகனம் கண்டறியப்பட்டது. அவர் ஆற்றில் குதித்திருக்கலாம் என சந்தேகிக்கப்படுகிறது. அவரது உயிரிழப்புக்கு காரணம் முழுமையான விசாரணைக்குப் பிறகே தெரியவரும்' என்றனர்.

மைசூரில் உள்ள விஸ்வேஸ்வரா நகர் தொழிற்பேட்டை பகுதியில் சுப்பண்ணா ஐயப்பன் வசித்து வந்தார். அவரை கடந்த 7-ஆம் தேதி முதல் காணவில்லை என அவரது குடும்பத்தினர் மைசூரு வித்யாரண்யபுரம் காவல் நிலையத்தில் புகார் அளித்தனர்.