கல்வியை நவீனமயமாக்குவதில் அரசு கவனம்

நாட்டின் எதிர்காலத்துக்கு இளைஞர்களைத் தயார்படுத்துவதில் முக்கியப் பங்கு வகிக்கும் கல்வி முறையை நவீனமயமாக்குவதில் அரசு கவனம் செலுத்தி வருகிறது என்று பிரதமர் நரேந்திர மோடி செவ்வாய்க்கிழமை தெரிவித்தார்.

- 

புது தில்லி, ஏப். 29:

புது தில்லி பாரத் மண்டபத்தில் நடைபெற்ற ‘ஒய்.யூ.ஜி.எம்.’ புத்தாக்க மாநாட்டில் உரையாற்றிய பிரதமர் மோடி, ஆராய்ச்சித்துறையில் சிந்தனையிலிருந்து இறுதித் தயாரிப்புக்கு இடையிலான பயணம் மிகக்குறுகிய காலத்தில் முடிவடைவது மிகவும் முக்கியம் என்று வலியுறுத்தினார்.

செயற்கை நுண்ணறிவு (ஏஐ), குவாண்டம் கம்ப்யூட்டிங், சுகாதார மற்றும் விண்வெளி தொழில்நுட்பத்தைத் தொடர்ந்து ஊக்குவிப்பதன் அவசியத்தை வலியுறுத்தி பிரதமர் மோடி ஆற்றிய உரை: 21-ஆம் நூற்றாண்டின் தேவைகளைப் பூர்த்தி செய்யும் வகையில் இந்தியாவின் கல்விமுறையை நவீனமயமாக்குவதற்கான முயற்சிகள் மேற்கொள்ளப்பட்டு வருகின்றன.

உலகளாவிய கல்வித் தரங்களை கருத்தில்கொண்டு தேசிய கல்விக் கொள்கை வடிவமைக்கப்பட்டது. இந்திய கல்விமுறையில் அது குறிப்பிடத்தக்க மாற்றங்களை கொண்டு வந்துள்ளது.