பிகாரில் வாக்குரிமை பயணம்: தொடங்கினார் ராகுல்

வாக்காளர் பட்டியல் சிறப்புத் திருத்தத்துக்கு எதிர்ப்பு தெரிவித்தும், வாக்குத் திருட்டுக்கு எதிரான போராட்டத்தை மக்கள் இயக்கமாக மாற்றும் நோக்கிலும் எதிர்க்கட்சிகள் சார்பிலான வாக்குரிமை பயணத்தை பிகாரில் ஞாயிற்றுக்கிழமை தொடங்கினார் மக்களவை எதிர்க்கட்சித் தலைவர் ராகுல் காந்தி.

- 

சசாரம், ஆக. 17:

ரோத்தாஸ் மாவட்டம், சசாரம் நகரில் நடைபெற்ற இந்தப் பயணத்தின் தொடக்க நிகழ்ச்சியில் காங்கிரஸ் தேசியத் தலைவர் மல்லிகார்ஜுன கார்கே, ராஷ்ட்ரீய ஜனதா தள நிறுவனர் லாலு பிரசாத் மற்றும் தலைவர் தேஜஸ்வி யாதவ், இடதுசாரி கட்சிகளின் தலைவர்கள் உள்ளிட்டோர் பங்கேற்றனர்.

இந்தப் பயணம் செப்டம்பர் 1-ஆம் தேதி பாட்னாவின் காந்தி மைதானத்தில் நடைபெறும் மாபெரும் பொதுக்கூட்டத்துடன் நிறைவடைய உள்ளது. நடை பயணமாகவும், வாகனப் பயணமாகவும் 16 நாள்கள் 1,300 கி.மீ. தொலைவைக் கடந்து 20-க்கும் மேற்பட்ட மாவட்டங்களில் மேற்கொள்ளப்படவுள்ளது.

வாக்குத் திருட்டு சதி: பயணத்தின் தொடக்க நிகழ்ச்சியில் ராகுல் காந்தி பேசியதாவது: கடந்த ஆண்டு நடந்து முடிந்த மக்களவைத் தேர்தல் மற்றும் பல்வேறு மாநில பேரவைத் தேர்தல்களில் வாக்குத் திருட்டு சதித் திட்டத்தை பாஜகவுடன் இணைந்து தேர்தல் ஆணையம் நடத்தியதை நாட்டு மக்கள் அனைவரும் அறிந்து கொண்டனர்.