நெல்லுக்கான குறைந்தபட்ச ஆதரவு விலை குவிண்டால் ரூ.2,369-ஆக உயர்வு

மத்திய அரசு அறிவிப்பு

- 

புது தில்லி, மே 28: 2025-26 காரீஃப் சந்தைப் பருவத்தில் நெல் கொள்முதலுக்கான குறைந்தபட்ச ஆதரவு விலையை 3 சதவீதம் அளவுக்கு உயர்த்தி, குவிண்டால் ரூ. 2,369-ஆக மத்திய அரசு நிர்ணயம் செய்தது.

தில்லியில் பிரதமர் நரேந்திர மோடி தலைமையில் புதன்கிழமை நடைபெற்ற பொருளாதார விவகாரங்களுக்கான மத்திய அமைச்சரவைக் கூட்டத்தில் இதற்கான முடிவு எடுக்கப்பட்டது.

தென்மேற்குப் பருவமழை வழக்கத்தைக் காட்டிலும் முன்கூட்டியே தொடங்கியுள்ள சூழலில், மத்திய அரசின் இந்த அறிவிப்பு வெளிவந்திருப்பது நாட்டின் உணவு உற்பத்தியில் 50 சதவீத பங்களிப்பை ஆற்றிவரும் காரீஃப் பருவ பயிரிடலுக்கு ஊக்கமளிப்பதாக அமைந்துள்ளது.

இதுகுறித்து மத்திய செய்தி மற்றும் ஒலிபரப்புத் துறை அமைச்சர் அஸ்வினி வைஷ்ணவ் தில்லியில் செய்தியாளர்களுக்கு அளித்த பேட்டி: விவசாயிகளின் நலனுக்காக மத்திய அமைச்சரவைக் கூட்டத்தில் இரண்டு முக்கிய முடிவுகள் எடுக்கப்பட்டுள்ளன.

விவசாயிகளுக்கு அவர்களின் விளைபொருள்களுக்கு உரிய விலை கிடைப்பதை உறுதிப்படுத்தும் வகையில் 2025-26 ஆம் ஆண்டுக்கான காரீஃப் பருவ பயிர்களுக்கான குறைந்தபட்ச ஆதரவு விலையை மத்திய அரசு உயர்த்தியுள்ளது. அதுபோல, விவசாயிகளுக்கான வட்டி மானியத் திட்டத்தை நீட்டிக்க முடிவெடுக்கப்பட்டுள்ளது.