அழகர் ஆற்றில் எழுந்தருளும் வைபவம்: போக்குவரத்து மாற்றம்

சித்திரைத் திருவிழாவையொட்டி, வைகை ஆற்றில் அழகர் எழுந்தருளும் வைபவத்துக்காக மதுரையில் திங்கள்கிழமை (மே 12) போக்குவரத்து மாற்றம் செய்யப்படுகிறது.

- 

மதுரை, மே 10:

இதுகுறித்து மதுரை மாநகரக் காவல் ஆணையர் அலுவலகம் வெளியிட்ட செய்திக் குறிப்பு: வைகை ஆற்றில் அழகர் எழுந்தருளும் வைபவம் திங்கள்கிழமை காலை 5.45 மணிக்கு மேல் 6.05 மணிக்குள் நடைபெறுகிறது.

இதையொட்டி, ராமராயர் மண்டபத்துக்குச் செல்லும் வழி, ஏ.வி. மேம்பாலம், யானைக்கல் புதுப்பாலம் வழியாக வாகனங்களுக்கு அனுமதி கிடையாது. ஒபுளா படித்துறை, வைகை தென்கரை, வடகரை ஆகிய பகுதிகளில் கார், இதர வாகனங்கள் நிறுத்த அனுமதியில்லை.

தென் பகுதியிலிருந்து எந்த வாகனமும் ஏ.வி. பாலம், செல்லூர் புதுப்பாலம் வழியாக வைகை வட பகுதிக்கு வர அனுமதி இல்லை. புதுநத்தம் சாலை, அழகர்கோவில் சாலை, அண்ணா நகர், கே.கே.நகர் மற்றும் நகரின் பிற பகுதிகளிலிருந்து வரும் அனுமதி அட்டை வைத்திருப்பவர்கள் திங்கள்கிழமை தங்களது வாகனங்களை அனுமதிக்கப்பட்ட இடங்களில் நிறுத்தலாம்.

குறிப்பாக, பச்சை நிற அனுமதி அட்டை வைத்திருப்பவர்கள் ஏ.வி. பாலம் தெற்கு பக்க நுழைவு வாயில் வழியாக உள்ளே வரும் வாகனங்கள் பெரியார் சிலை, ஆவின் சந்திப்பு, குருவிக்காரன் சாலை, காமராஜர் சாலை, முனிச்சாலை சந்திப்பு, ஒபுளாபடித்துறை சந்திப்பு, அம்சவல்லி சந்திப்பு, கீழ வெளிவீதி, நெல்பேட்டை, அண்ணா சிலை அருகே அமைக்கப்பட்ட நிறுத்தங்களில் கார்களை நிறுத்த வேண்டும்.