வரத்து வாய்க்கால்கள் ஆக்கிரமிப்பு மழைநீர் தேக்கத்தால் வாகன ஓட்டிகள், பொதுமக்கள் அவதி

பெரம்பலூர் நகரில் உள்ள கழிவுநீர் கால்வாய்கள் மற்றும் மழைநீர் வரத்து வாய்க்கால்கள் போதிய பராமரிப்பில்லாததாலும், ஆக்கிரமிக்கப்பட்டுள்ளதாலும் மழைக்காலங்களில் தண்ணீர் தேங்குவதால் பயணிகளும், பொதுமக்களும் பெரிதும் அவதிக்குள்ளாகியுள்ளனர்.

- நமது நிருபர்

பெரம்பலூர், ஆக. 11:

பெரம்பலூர் புறநகர் பேருந்து நிலையத்தில் சுமார் 100-க்கும் மேற்பட்ட கடைகளும், கட்டணக் கழிப்பிடம், இலவச கழிப்பிடம் உள்ளன. இங்கிருந்து வெளியேற்றப்படும் கழிவுநீரானது, பேருந்து நிலையத்தின் அருகேயுள்ள கழிவுநீர் கால்வாய் மூலமாக பாலக்கரை பகுதியிலுள்ள வரத்து வாய்க்காலில் கலக்கும் வகையில் அமைக்கப்பட்டுள்ளது.

அதேபோல, நகரின் விரிவாக்கப் பகுதிகளிலிருந்து வரும் மழைநீரும், மேற்கண்ட வரத்து வாய்க்கால் வழியாக துறைமங்கலம் பெரிய ஏரிக்கு செல்கிறது.

மூடப்பட்ட கழிவுநீர் கால்வாய்கள்: இந்நிலையில், பேருந்து நிலையத்தில் உள்ள கழிவுநீர் கால்வாய் கடந்த பல ஆண்டுக்கும் மேலாக தூர்வாரப்படாததால், அதில் அடைப்பு ஏற்பட்டு கழிவுநீர் தேங்கி துர்நாற்றம் வீசுகிறது.

மேலும், பேருந்து நிலைய வளாகத்திலுள்ள வியாபாரிகள் தங்களது கடைகளிலிருந்து சேர்க்கப்படும் கழிவுகளை கழிவுநீர் கால்வாய்களில் கொட்டியதால், அங்குள்ள வரத்து வாய்க்கால்கள் இருந்ததற்கான சுவடுகளே இல்லாத நிலை ஏற்பட்டுள்ளது. இதனால், மழை பெய்தால் நீர் செல்ல வழியின்றி பேருந்து நிலையத்தில் குளம் போல் தேங்கி நிற்கிறது. கழிவுநீரையும் வெளியேற்ற முடியாத சூழல் நிலவுகிறது.