திமுக ஆட்சியில் காவலர்களுக்கே பாதுகாப்பு இல்லை

எடப்பாடி கே.பழனிசாமி குற்றச்சாட்டு

- 

கடையநல்லூர், ஆக. 6: திமுக ஆட்சியில் காவலர்களுக்கே பாதுகாப்பு இல்லை என்றார் அதிமுக பொதுச் செயலர் எடப்பாடி கே.பழனிசாமி.

தென்காசி மாவட்டத்தில் ‘மக்களை காப்போம் தமிழகத்தை மீட்போம்’ என்ற தேர்தல் பிரசார சுற்றுப்பயணம் மேற்கொண்டுள்ள அவர், புதன்கிழமை மாலை கடையநல்லூர் அரசு மருத்துவமனை பேருந்து நிறுத்தப் பகுதியில் பேசியதாவது:

தமிழகத்தில் காவல் நிலையத்திலேயே ஒருவர் தற்கொலை செய்கிறார். மற்றொரு பக்கத்தில் காவல் உதவி ஆய்வாளர் வெட்டிக் கொலை செய்யப்படுகிறார். மக்களைப் பாதுகாக்கும் காவல்துறையினருக்கே திமுக ஆட்சியில் பாதுகாப்பு இல்லை. இது சாதாரண விஷயம் இல்லை. தமிழகத்தில் சட்டம்-ஒழுங்கு கெட்டுவிட்டது.

கிராமம் முதல் நகரம் வரை அனைத்து இடங்களிலும் கஞ்சா உள்ளிட்ட போதைப்பொருள் விற்பனை அதிகரித்துள்ளதுதான் இதற்குக் காரணம். திறமையற்ற முதல்வரால் காவல்துறையும் செயல் இழந்து விட்டது.