பேரவைத் தலைவருக்கு எதிரான தீர்மானம் தோல்வி

எதிர்ப்பு-154; ஆதரவு-63

- 

சென்னை, மார்ச் 17: தமிழக சட்டப்பேரவைத்தலைவர் மு.அப்பாவுவை பதவி நீக்கக் கோரும் அதிமுகவின் தீர்மானம் திங்கள்கிழமை தோல்வி அடைந்தது. பேரவையில் தீர்மானத்துக்கு எதிராக திமுக மற்றும் அதன் கூட்டணிக் கட்சிகளின் உறுப்பினர்கள் 154 பேரும், ஆதரவாக முன்னாள் முதல்வர் ஓ.பன்னீர்செல்வம் உள்பட அதிமுக உறுப்பினர்கள் 53 பேரும் வாக்களித்தனர். அதேசமயம், பாஜக, பாமக ஆகிய கட்சிகளின் உறுப்பினர்கள் வாக்கெடுப்பின்போது அவையில் இல்லை.

அதிமுக தீர்மானம்: சட்டப்பேரவையில் திங்கள்கிழமை கேள்வி நேரம் நிறைவடைந்ததும், பேரவைத் தலைவரை பதவியிலிருந்து நீக்கக் கோரும் அதிமுகவின் நம்பிக்கையில்லா தீர்மானம் விவாதத்துக்கு எடுத்துக்கொள்ளப்பட்டது. இதனை எதிர்க்கட்சி துணைத்தலைவர் ஆர்.பி.உதயகுமார் முன்மொழிந்தார். பேரவையில் ஒரு உறுப்பினர் முன்மொழிந்த தீர்மானத்தை விவாதத்துக்கு எடுக்க, பேரவை விதி 70 (2)-ன்படி, 35-க்கும் குறையாத உறுப்பினர்களின் ஆதரவு இருக்க வேண்டும். அந்த அடிப்படையில், உதயகுமார் முன்மொழிந்த தீர்மானத்துக்கு ஆதரவு இருக்கிறதா என பேரவைத் தலைவர் மு.அப்பாவு கேள்வி எழுப்பினார். அதற்கு, அப்போது அவையில் இருந்த அதிமுக உறுப்பினர்கள் 63 பேர் எழுந்து நின்றனர். தீர்மானத்துக்கு 35-க்கும் அதிகமான உறுப்பினர்கள் ஆதரவு இருப்பதால், அதிமுகவால் முன்மொழியப்பட்ட தீர்மானத்தை விவாதத்துக்கு எடுத்துக்கொள்வதாக பேரவைத் தலைவர் மு.அப்பாவு அறிவித்தார்.

இருக்கையிலிருந்து இறங்கினார்: பேரவைத் தலைவர் மீதே நம்பிக்கையில்லாத தீர்மானம் அளிக்கப்பட்டதால், அதன் மீது வாக்கெடுப்பு நடத்தும் பொறுப்பை பேரவை துணைத்தலைவர் கு.பிச்சாண்டி இடம் அப்பாவு ஒப்படைத்தார். இதையடுத்து வாக்கெடுப்பு நடத்தும் பொறுப்பை துணைத்தலைவர் பிச்சாண்டி ஏற்று அவையை நடத்தத் தொடங்கினார். எதிர்க்கட்சி துணைத்தலைவர் ஆர்.பி.உதயகுமார் முன்மொழிந்த தீர்மானத்தை எதிர்க்கட்சி கொறடா எஸ்.பி.வேலுமணி வழிமொழிந்தார். இதையடுத்து, தீர்மானத்தின் மீது பேச எதிர்க்கட்சித் தலைவர் எடப்பாடி கே.பழனிசாமிக்கு அனுமதி தரும்படி ஆர்.பி.உதயகுமார் கோரிக்கை விடுக்க, அதனை பேரவை துணைத்தலைவர் ஏற்றுக்கொண்டு அனுமதித்தார்.