தாளவாடி மலைப் பகுதியில் தடுப்பணைகளை உருவாக்க விவசாயிகள் எதிர்பார்ப்பு

மழைக்காலத்தில் தாளவாடி மலைப்பகுதிகளில் காட்டாறுகளில் வெள்ளப்பெருக்கு ஏற்பட்டு கர்நாடக மாநில அணைகளை நிரப்பி வரும் நிலையில், இந்த மலைப்பகுதிகளில் தடுப்பணைகளை அமைத்து நிலத்தடி நீர்மட்டத்தை உயர்த்த நடவடிக்கை எடுக்க வேண்டும் என விவசாயிகள் எதிர்பார்க்கின்றனர்.

- கே.விஜயபாஸ்கர்

ஈரோடு, ஆக.24:

ஈரோடு மாவட்டம், அந்தியூரை அடுத்த பர்கூர் மலைப்பகுதியில் 30-க்கும் மேற்பட்ட கிராமங்கள் உள்ளன. அதுபோல பண்ணாரியை அடுத்த தாளவாடி, கடம்பூர் மலைப்பகுதிகளில் 100-க்கும் மேற்பட்ட கிராமங்கள் உள்ளன. சத்தியமங்கலம் புலிகள் காப்பகம் மற்றும் அரசு சரணாலயமாக அறிவித்துள்ள பர்கூர் வனப்பகுதியில் ஏராளமான விலங்குகள் உள்ளன.

தாளவாடியைச் சுற்றியுள்ள கிராம விவசாயிகள் வாழை, கரும்பு, தென்னை மற்றும் தர்ப்பூசணி, முட்டைக்கோஸ், தக்காளி, காய்கறி வகைகளைப் பயிரிட்டு வருகின்றனர். இப்பகுதி கிராமங்களில் வசிக்கும் மக்களுக்கான குடிநீரில் தொடங்கி, விவசாயம் வரை அனைத்துக்கும் ஆழ்துளைக் கிணறுகள் மூலமே நீர் எடுக்கப்படுகிறது.

தாளவாடி சுற்றுவட்டாரப் பகுதியில் உள்ள விவசாய நிலங்களில் 90 சதவீதம் ஆழ்குழாய் கிணறு மூலமே பாசனம் பெறுகின்றன. ஆரம்ப காலத்தில் 300 அடியில் நீர் கிடைத்து வந்த நிலையில், தற்போது 1000 அடிக்கு மேல் தோண்டினாலும் நீர் கிடைப்பதில்லை. வனப்பகுதியில் மழைப்பொழிவு நன்றாக இருந்தாலும், நீரைத் தேக்கி வைக்க அரசு நடவடிக்கை எடுக்காததே இதற்குக் காரணம்.

கர்நாடகத்துக்குச் செல்லும் வெள்ள நீர்:

கர்நாடக மாநிலத்தில் நீர்த் தேக்கங்களில் உள்ள நீரை, குழாய்கள் மூலம் கொண்டு சென்று குளம், குட்டைகளை நிரப்புகின்றனர். அதனால் அங்கு நிலத்தடி நீர்மட்டம் நன்றாக உள்ளது.