தெரு நாய்கள் விவகார வழக்கு: மூன்று நீதிபதிகள் அமர்வுக்கு மாற்றம்

உச்சநீதிமன்றத்தில் இன்று விசாரணை

- நமது நிருபர்

நமது நிருபர் புது தில்லி, ஆக. 13: தெரு நாய்கள் விவகாரம் தொடர்புடைய வழக்கை மூன்று நீதிபதிகள் அமர்வுக்கு மாற்றி உச்சநீதிமன்ற தலைமை நீதிபதி பி.ஆர்.கவாய் புதன்கிழமை உத்தரவிட்டார்.

இதைத் தொடர்ந்து, இந்த வழக்கு நீதிபதிகள் விக்ரம் நாத் தலைமையிலான அமர்வு முன்பாக வியாழக்கிழமை விசாரணைக்கு பட்டியலிடப்பட்டுள்ளது. நீதிபதிகள் சந்தீப் மேத்தா, என்.வி. அஞ்சாரியா ஆகியோரும் இந்த அமர்வில் இடம்பெற்றுள்ளனர்.

முன்னதாக, இந்த விவகாரத்தை அவசர வழக்காகக் கருதி விசாரணைக்குப் பட்டியலிட உச்சநீதிமன்றத்தில் தலைமை நீதிபதி முன் புதன்கிழமை முறையிடப்பட்டது. அவரது கோரிக்கையை பரிசீலிப்பதாக தெரிவித்த தலைமை நீதிபதி பி.ஆர். கவாய், மாலையில் மூன்று நீதிபதிகள் அமர்வு விசாரணைக்கு வழக்கை மாற்றி உத்தரவிட்டார்.