குடிநீர்த் திட்டங்களில் குளறுபடி: திண்டுக்கல்லில் குடிநீர் விநியோகம் பாதிப்பு

திண்டுக்கல் மாநகராட்சிக்கு நாள்தோறும் விநியோகிக்கப்பட்டு வந்த குடிநீர், கடந்த சில மாதங்களாக 3 நாள்களுக்கு ஒரு முறையாக மாற்றப்பட்டு விட்டதாகக் குற்றச்சாட்டு எழுந்துள்ளது.

- நமது நிருபர்

திண்டுக்கல், ஜூலை 29:

திண்டுக்கல் மாநகராட்சிப் பகுதியில் வசிக்கும் சுமார் 2.50 லட்சம் மக்களுக்கு, ஆத்தூர் காமராஜர் நீர்த்தேக்கம், காவிரி கூட்டுக் குடிநீர்த் திட்டங்கள் மூலம் குடிநீர் விநியோகம் செய்யப்பட்டு வருகிறது.

ஆத்தூர் காமராஜர் நீர்த்தேக்கத்திலிருந்து நாளொன்றுக்கு 16 மில்லியன் லிட்டர், காவிரி கூட்டுக் குடிநீர் திட்டம் மூலம் நாளொன்றுக்கு 7 மில்லியன் லிட்டர் குடிநீர் விநியோகம் செய்யும் வகையில் செயல்படுத்தப்படுகின்றன.

சிறப்பாகச் செயல்பட்ட இந்தத் திட்டங்கள் மூலம் திண்டுக்கல் மாநகராட்சிப் பகுதிகளில் நாள்தோறும் குடிநீர் விநியோகம் செய்யப்பட்டு வந்தது.

இந்த நிலையில், கடந்த சில மாதங்களாக ஆத்தூர் காமராஜர் நீர்த்தேக்கம், காவிரி கூட்டுக் குடிநீர் திட்டங்கள் மூலம் 14 மில்லியன் லிட்டர் பெறப்பட்டு வந்த தண்ணீரின் அளவு தற்போது 4 மில்லியன் லிட்டராகக் குறைந்துவிட்டது.

இதன் காரணமாக, மாநகராட்சிப் பகுதிகளில் நாளொன்றுக்குப் பதிலாக 3 நாள்களுக்கு ஒரு முறை குடிநீர் விநியோகம் செய்யப்பட்டு வருகிறது.

திண்டுக்கலுக்கு பெறப்படும் குடிநீரின் அளவு குறைந்ததற்கு, ஆத்தூர் காமராஜர் நீர்த்தேக்கத்தில் மாநகராட்சியின் கண்காணிப்புக் குறைபாடுகளும், காவிரி கூட்டுக் குடிநீர்த் திட்டத்துக்கு குடிநீர் வடிகால் வாரியத்துக்கான நிலுவைத் தொகையுமே காரணம் எனக் கூறப்படுகிறது.

1958 குடிநீர்த் திட்டத்தில் மின்மோட்டார் பழுது: ஆத்தூர் காமராஜர் நீர்த்தேக்கத்திலிருந்து 1958-ஆம் ஆண்டுமுதல் செயல்பட்டு வரும் பழைய குடிநீர்த் திட்டம், ஜைக்கா குடிநீர்த் திட்டம் என 2 திட்டங்கள் உள்ளன.