பிகாரில் ஜனநாயகப் படுகொலை

பிகாரில் 65 லட்சம் வாக்காளர்களை பட்டியலில் இருந்து நீக்கியது ஜனநாயகப் படுகொலை என்று முதல்வர் மு.க.ஸ்டாலின் கூறினார்.

- 

சென்னை, ஆக. 27: மேலும், சாவி கொடுத்தால் ஆடும் பொம்மையாக தேர்தல் ஆணையத்தை பாஜக மாற்றிவிட்டது என்றும் அவர் குற்றஞ்சாட்டினார். நாடு முழுவதும் வாக்குத் திருட்டு நடைபெற்றுள்ளதாக புகார் தெரிவித்து, பிகாரில் காங்கிரஸ் மூத்த தலைவர் ராகுல் காந்தி தலைமையில் வாக்குரிமைப் பயணத்தை எதிர்க்கட்சிகள் கடந்த 17-ஆம் தேதி முதல் நடத்தி வருகின்றன. பிகார் முஸாஃபர் நகரில் புதன்கிழமை நடைபெற்ற பேரணியில் தமிழக முதல்வர் மு.க.ஸ்டாலினும் பங்கேற்றார். இதில், ராஷ்ட்ரீய ஜனதா தளத்தின் தலைவர் தேஜஸ்வி யாதவ், திமுக எம்.பி. கனிமொழி உள்ளிட்டோரும் பங்கேற்றனர்.

பின்னர் நடைபெற்ற பொதுக்கூட்டத்தில் மு.க. ஸ்டாலின் தமிழில் நிகழ்த்திய உரை ஹிந்தியில் மொழிபெயர்க்கப்பட்டது. அதன் விவரம்: கடந்த ஒரு மாத காலமாக, இந்தியாவே பிகாரைத்தான் பார்த்துக் கொண்டிருக்கிறது. இந்தியாவின் ஜனநாயகத்துக்கு ஆபத்து வரும்போதெல்லாம், அதற்கான போர்க்குரலை பிகார் எழுப்பியிருக்கிறது. இதுதான் வரலாறு.