ரஷியா - உக்ரைன் போர்: என்னதான் தீர்வு?

அமெரிக்கா உள்ளிட்ட நாடுகளின் கண்டனங்கள் ஆகியவற்றைப் பொருட்படுத்தாமல் 3 ஆண்டுகளாகத் தொடர்ந்து உக்ரைன் மீது போர் நடத்தி வருகிறது ரஷியா. இந்த நிலையில்தான் போர் தொடர்பாக உக்ரைனுடன் இஸ்தான்புல்லில் கடந்த மே 15-ஆம் தேதியன்று நேரடிப் பேச்சுவார்த்தையைத் தொடங்கியது.

- முனைவர் வைகைச்செல்வன்

அமெரிக்கா அங்கம் வகிக்கும் நேட்டோ அமைப்பில் உக்ரைன் இணைவதற்கு எதிர்ப்புத் தெரிவித்த ரஷியா 2022-ஆம் ஆண்டு பிப்ரவரியில் போர் தொடுத்தது. மூன்று ஆண்டு காலமாக இடைவிடாத தாக்குதலை உக்ரைன் தாக்குப்பிடித்து வருகிறது. ஒரு வாரப் போரையே உக்ரைன் தாக்குப்பிடிக்க முடியாது என்று ரஷியா தப்புக் கணக்குப் போட்டு விட்டது.

ஆனால், நிலைமை வேறு மாறாகி விட்டது. அதன்பிறகு எத்தனையோ பேச்சுவார்த்தைகள், அமெரிக்கா உள்ளிட்ட நாடுகளின் கண்டனங்கள் ஆகியவை குறித்து கிஞ்சிற்றும் பொருட்படுத்தாமல் 3 ஆண்டுகளாகத் தொடர்ந்து உக்ரைன் மீது போர் நடத்தி வருகிறது ரஷியா. இந்த நிலையில்தான் போர் தொடர்பாக உக்ரைனுடன் இஸ்தான்புல்லில் கடந்த மே 15-ஆம் தேதியன்று நேரடிப் பேச்சுவார்த்தையைத் தொடங்கியது.

2022-இல் உக்ரைன்தான் பேச்சுவார்த்தையை முறித்துக் கொண்டது; ரஷியா அல்ல. ஆகவே எந்த முன்நிபந்தனைகளும் இல்லாமல் உக்ரைன் நேரடிப் பேச்சுவார்த்தைகளை மீண்டும் தொடங்க வேண்டும் என்று ரஷியா முனைந்தது.

ஏற்கெனவே நடந்த பேச்சுவார்த்தைகளின் முடிவில் உக்ரைன் பேச்சுவார்த்தைக் குழு தலைவரின் முயற்சியால் ஒரு கூட்டு வரைவு ஆவணம் தயாரிக்கப்பட்டது. துரதிருஷ்டவசமாக மேற்கத்திய நாடுகளின் வற்புறுத்தலின்பேரில், அது குப்பையில் வீசப்பட்டது என்பதைப் பதிவு செய்தே ஆக வேண்டும். இருந்தபோதிலும் ரஷியா பலமுறை போர் நிறுத்த முயற்சிகளை மேற்கொண்டு வருகிறது.

ரஷியா - உக்ரைன் போர் நிறுத்தம் எப்போது? அந்தப் பகுதி மக்கள் தொடர்ந்து பாதிக்கப்பட்டு வருகிறார்களே! அவர்களின் துயரத்துக்கு ஆறுதலும், தேறுதலும் எப்போது கிடைக்கும் என்பதற்கான விடை கண்ணுக்கு எட்டிய தொலைவு வரை கிடைக்கவில்லை. ஆகவேதான் ‘எங்களின் போர் நிறுத்தத் திட்டங்கள் எதற்கும் உக்ரைன் அதிகாரிகள் செவி மடுக்கவில்லை’ என்று ரஷியா கனத்த இதயத்தோடு மீண்டும் சொன்னது. இதற்கு ஒரு உதாரணமாக இடையில் போர் நிறுத்தம் அறிவிக்கப்பட்ட 3 நாள்களில் 5 முறை ரஷிய எல்லையைத் தாக்க முயற்சிகள் மேற்கொண்டது உக்ரைன் என்பதைத் தெரிவித்தே ஆக வேண்டும்.