9 பேருக்கு சாகும் வரை ஆயுள் தண்டனை

பொள்ளாச்சி பாலியல் வழக்கில் நீதிமன்றம் தீர்ப்பு

- 

கோவை, மே 13: தமிழகத்தில் மிகவும் பரபரப்பை ஏற்படுத்திய பொள்ளாச்சி பாலியல் வழக்கில் கைது செய்யப்பட்ட 9 பேருக்கும் சாகும் வரை ஆயுள் தண்டனை விதித்து கோவை மகளிர் நீதிமன்றம் தீர்ப்பளித்தது. அதில் இருவருக்கு தலா 5 ஆயுள் தண்டனை விதிக்கப்பட்டது.

கோவை மாவட்டம், பொள்ளாச்சியில் இளம்பெண்களை பாலியல் துன்புறுத்தல் செய்து விடியோ எடுத்த சம்பவம் தொடர்பாக பாதிக்கப்பட்ட இளம்பெண் ஒருவர் பொள்ளாச்சி நகர (கிழக்கு) காவல் நிலையத்தில் கடந்த 2019 பிப்ரவரியில் புகார் அளித்தார். இந்த புகாரின்பேரில் திருநாவுக்கரசு (31), சபரிராஜன் (31), வசந்தகுமார் (33) சதீஷ் (34), மணிவண்ணன் (31) ஆகிய 5 பேர் கடந்த 2019-ஆம் ஆண்டு கைது செய்யப்பட்டனர். ஹேரன்பால் (35), பாபு என்ற பைக் பாபு (34), அருளானந்தம் (40), அருண்குமார் (33) ஆகிய 4 பேர் 2021-இல் கைது செய்யப்பட்டனர்.