பாஜகவுடன் அதிமுக கூட்டணியா?

எடப்பாடி கே. பழனிசாமி பதில்

- நமது சிறப்பு நிருபர்

நமது சிறப்பு நிருபர் புதுதில்லி, மார்ச் 26: பாஜகவுடன் அதிமுக கூட்டணி அமைக்கப்போகிறதா என்ற கேள்விக்குப் பதிலளித்த அதிமுக பொதுச் செயலர் எடப்பாடி கே.பழனிசாமி, கூட்டணி என்பது சந்தர்ப்ப சூழ்நிலைக்குத் தகுந்தவாறு மாறும் என்றார்.

மத்திய உள்துறை அமைச்சர் அமித் ஷாவை தில்லியில் எடப்பாடி பழனிசாமி செவ்வாய்க்கிழமை இரவு சந்தித்தார். தமிழகத்தின் சட்டம்-ஒழுங்கு பிரச்னை உள்ளிட்ட விஷயங்கள் குறித்து அமித் ஷாவிடம் அவர் புகார் தெரிவித்ததாகக் கூறப்பட்டாலும், தமிழகத்தில் அடுத்த ஆண்டு நடைபெறவுள்ள சட்டப்பேரவைத் தேர்தலில் பாஜகவுடன் அதிமுக மீண்டும் கூட்டணி அமைப்பது தொடர்பாகப் பேசியதாகத் தகவல்கள் வெளியாகின.

கடந்த 2021 சட்டப்பேரவைத் தேர்தலில் அதிமுக கூட்டணியில் பாஜக இடம்பெற்றது. 2024 மக்களவைத் தேர்தலில் கூட்டணி முறிந்து இரு கட்சிகளும் தனித்தனியாகப் போட்டியிட்டன. அத்தேர்தலில் இக்கூட்டணி தமிழகம், புதுவையில் ஒரு தொகுதியில்கூட வெற்றி பெறவில்லை.

அண்மையில் சேலத்தில் பேட்டி அளித்த எடப்பாடி பழனிசாமி, அதிமுகவின் ஒரே எதிரி திமுக மட்டுமே; வேறு யாரும் எதிரி இல்லை என்று தெரிவித்தார். இதனால், பாஜகவுடன் அதிமுக மீண்டும் கூட்டணி அமைக்கலாம் எனக் கூறப்பட்டது.