நடப்பு சாம்பியன்கள் சின்னர், கீஸ் வெற்றி

ஆஸ்திரேலிய ஓபன் கிராண்ட்ஸ்லாம் டென்னிஸ் போட்டியில், நடப்பு சாம்பியன்களான இத்தாலியின் யானிக் சின்னர், அமெரிக்காவின் மேடிசன் கீஸ் ஆகியோர் தங்களது பிரிவில் 3-ஆவது சுற்றுக்கு வியாழக்கிழமை முன்னேறினர்.

- 

ஆடவர் ஒற்றையர் 2-ஆவது சுற்றில், உலகின் 2-ஆம் நிலை வீரரான யானிக் சின்னர் 6-1, 6-4, 6-2 என்ற நேர் செட்களில், ஆஸ்திரேலியாவின் ஜேம்ஸ் டக்வொர்த்தை வெளியேற்றினார். 3-ஆவது சுற்றில் அவர், அமெரிக்காவின் எலியட் ஸ்பிஸிரியை எதிர்கொள்கிறார்.

9-ஆம் இடத்திலிருக்கும் அமெரிக்காவின் டெய்லர் ஃப்ரிட்ஸ் 6-1, 6-4, 7-6 (7/4) என்ற வகையில், செக் குடியரசின் விட் கோப்ரிவாவை வீழ்த்தினார். அடுத்து அவர், 3 முறை கிராண்ட்ஸ்லாம் சாம்பியனான சுவிட்ஸர்லாந்தின் ஸ்டான் வாவ்ரிங்காவுடன் மோதுகிறார்.