அரசு சித்த மருத்துவமனையில் விரைவில் செயற்கை கருத்தரித்தல் மையம்

அமைச்சர் மா.சுப்பிரமணியன்

- 

சென்னை, ஜூன் 21: அரசு சித்த மருத்துவமனையில் விரைவில் செயற்கை கருத்தரித்தல் மையம் தொடங்கப்படும் என மக்கள் நல்வாழ்வுத் துறை அமைச்சர் மா.சுப்பிரமணியன் கூறினார்.

சென்னை அரும்பாக்கத்தில் உள்ள அரசு யோகா மற்றும் இயற்கை மருத்துவக் கல்லூரி மருத்துவமனையில் சர்வதேச யோகா தினம் சனிக்கிழமை கொண்டாடப்பட்டது.

இதைத் தொடர்ந்து அமைச்சர் மா.சுப்பிரமணியன் செய்தியாளர்களிடம் கூறியதாவது:

முதல்வர் மு.க.ஸ்டாலின் கடந்த 2022-ஆம் ஆண்டு ரூ. 96 கோடி மதிப்பீட்டில் சர்வதேச யோகா மற்றும் இயற்கை மருத்துவ அறிவியல் நிறுவனத்தை செங்கல்பட்டு மாவட்டத்தில் தொடங்கி வைத்தார். துணை முதல்வர் உதயநிதி ஸ்டாலின், யோகாவுக்கான ஒரு கேலோ இந்தியா விருதை கடந்த 2024-ஆம் ஆண்டு வழங்கினார். தற்போது, சித்த மருத்துவர்கள் 59, ஆயுர்வேத மருத்துவர்கள் 2, யுனானி மருத்துவர் ஒருவர், யோகா மற்றும் இயற்கை மருத்துவர்கள் 53 என மொத்தம் 115 பேருக்கு ஜூன் 30-ஆம் தேதி பணி நியமன ஆணை வழங்கப்படவுள்ளது.