காங்கிரஸ், ஆர்ஜேடிக்கு 'குடும்பமே முதன்மையானது'

தங்கள் குடும்பத்தின் வளர்ச்சியே முதன்மையானது என்பதுதான் காங்கிரஸ், ராஷ்ட்ரீய ஜனதா தளம் (ஆர்ஜேடி) கட்சிகளின் அரசியல் மையப்புள்ளி என்று பிரதமர் நரேந்திர மோடி விமர்சித்தார்.

- 

சிவான், ஜூன் 20: தங்கள் குடும்பத்தின் வளர்ச்சியே முதன்மையானது என்பதுதான் காங்கிரஸ், ராஷ்ட்ரீய ஜனதா தளம் (ஆர்ஜேடி) கட்சிகளின் அரசியல் மையப்புள்ளி என்று பிரதமர் நரேந்திர மோடி விமர்சித்தார். பிகாரில் இருந்து பிழைப்பு தேடி மக்கள் புலம்பெயர இவ்விரு கட்சிகளுமே காரணம் என்றும் அவர் குற்றஞ்சாட்டினார். முதல்வர் நிதீஷ்குமார் தலைமையில் தேசிய ஜனநாயக கூட்டணி ஆளும் பிகாரில் அடுத்த சில மாதங்களில் பேரவைத் தேர்தல் நடைபெறவுள்ளது.

இந்த மாநிலத்தின் சிவான் பகுதியில் வெள்ளிக்கிழமை நடைபெற்ற நிகழ்ச்சியில், மொத்தம் ரூ.5,900 கோடிக்கும் அதிக மதிப்பில் பணி நிறைவடைந்த வளர்ச்சித் திட்டங்களைத் தொடங்கி வைத்த பிரதமர் மோடி, புதிய திட்டங்களுக்கும் அடிக்கல் நாட்டினார். பாட்னா-கோரக்பூர் (உத்தர பிரதேசம்) இடையிலான வந்தே பாரத் ரயில் சேவையையும் தொடங்கிவைத்தார்.

பின்னர், பொதுக்கூட்டத்தில் அவர் பேசியதாவது: பிகாரில் காங்கிரஸ், ஆர்ஜேடி ஆட்சிக் காலத்தில் வறுமையும், அராஜகமும் தலைவிரித்தாடின. பல்லாண்டுகளாக நீடித்த வறுமையால் மாநில மக்கள் பிழைப்பு தேடி பிற இடங்களுக்குப் புலம்பெயர்ந்தனர்.