திருக்குறளை தேசிய நூலாக அறிவிக்கும் முயற்சியில் தீவிரம்

காலங்கள் கடந்து வாழும் வள்ளுவர் மறையை இந்திய நாட்டின் தேசிய நூலாக அறிவிக்கும் முயற்சியில் நாம் இன்னும் அதிகமாக கவனம் செலுத்தியாக வேண்டும். இதற்காக திருக்குறளின் சிறப்பை முழுமையாகச் சொல்லும் வகையிலான மாபெரும் அமைப்பைத் தலைநகர் தில்லியில் நாம் உருவாக்க வேண்டும் என முதல்வர் மு.க.ஸ்டாலின் வலியுறுத்தினார்.

- 

சென்னை, ஜூலை 13:

திருக்குறளுக்கு, ‘வள்ளுவர் மறை வைரமுத்து உரை’ என்ற தலைப்பில் கவிஞர் வைரமுத்து உரை எழுதி நூலாக்கி உள்ளார். இதைச் சென்னை காமராஜர் அரங்கத்தில் ஞாயிற்றுக்கிழமை நடைபெற்ற நிகழ்ச்சியில் முதல்வர் மு.க.ஸ்டாலின் வெளியிட, முன்னாள் மத்திய அமைச்சர் ப.சிதம்பரம் பெற்றுக் கொண்டார்.

விழாவில் முதல்வர் மு.க.ஸ்டாலின் பேசியது: கவிஞர் வைரமுத்துவின் பிறந்த நாளுக்கு நாம்தான் அவருக்குப் பரிசு கொடுக்க வேண்டும். ஆனால், அவர் நமக்கு இந்தப் புத்தகத்தைப் பரிசாகத் தந்திருக்கிறார். அதற்காக அனைவரின் சார்பில் அவருக்கு எனது நன்றியைத் தெரிவித்துக் கொள்கிறேன்.

திருக்குறள் இரண்டு அடிதான்; ஆனால், இரண்டாயிரம் ஆண்டுகளுக்கு மேலாக, அதற்குப் புதுப்புதுப் பொருள்கள் சொல்லி, உலக மக்கள் எல்லோருக்கும் புது வழியை - நல்வழியைச் சொல்லக் கூடிய உலக இலக்கியமாக உயர்ந்து நிற்கிறது.