வெளியானது மாஸ்டர் பிளான்: செய்ய வேண்டியது என்ன?

எதிர்காலத்தில் ஒரு மாநகருக்கு என்னென்ன அடிப்படை வசதிகள் தேவைப்படும், எதிர்காலத்தில் பெருக இருக்கும் மக்கள் தொகைக்கு ஏற்ப அவை எந்த அளவுக்கு ஏற்படுத்தப்பட வேண்டும், அந்த நகரின் சமூக, பொருளாதார உள்கட்டமைப்பு எப்படி அமைய வேண்டும் என்பதை விளக்கப் படங்கள், வரைபடங்கள் மூலமாக விளக்கும் அறிக்கைதான் 'மாஸ்டர் பிளான்' எனப்படும் முழுமைத் திட்டமாகும்.

- க.தங்கராஜா

ஒரு நகரம் கடந்த சுமார் 20 ஆண்டுகளில் எத்தகைய வளர்ச்சியைப் பெற்றிருக்கிறது என்பதைக் கணக்கிட்டு, அடுத்த 20 ஆண்டுகளில் அது எத்தகைய வளர்ச்சியைப் பெறும் என்பதைக் கணக்கிடுவதாக அமையும். தமிழ்நாடு நகர ஊரமைப்புச் சட்டம் 1971-இன் அடிப்படையிலில் 'மாஸ்டர் பிளான்' எனப்படும் முழுமைத் திட்டம் தயாரிக்கப்படுகிறது. ஒவ்வொரு மாஸ்டர் பிளானும் 5 ஆண்டுகளுக்கு ஒரு முறை திருத்தப்படும்.

கோவையில் கடைசியாக கடந்த 1994-ஆம் ஆண்டில் அப்போதைய அரசால் 'மாஸ்டர் பிளான்' அங்கீகரிக்கப்பட்டு நடைமுறைக்கு கொண்டுவரப்பட்டது.

கோவையின் மக்கள் தொகை சுமார் 14.35 லட்சமாக இருந்த அந்த காலகட்டத்தில் கொண்டு வரப்பட்ட மாஸ்டர் பிளான், 1,287 சதுர கி.மீ. பரப்பளவைக் கொண்டிருந்தது. இடைப்பட்ட 30 ஆண்டுகளில் மாநகரம் மிகப் பெரிய அளவில் விரிவடைந்திருக்கிறது.

30 ஆண்டுகளில் மக்கள் தொகை, மூன்று மடங்கு அதிகரித்து, தமிழகத்தின் மூன்றாவது பெரிய நகரமாக இருந்த கோவை, தற்போது இரண்டாவது பெரிய நகரமாக வளர்ந்துள்ளது. அப்போது விளைநிலங்களாக இருந்த பெரும்பாலான பகுதிகள் தற்போது குடியிருப்புகள், தொழிற்சாலைகள் உள்ளிட்ட பயன்பாட்டுப் பகுதிகளாக மாறியுள்ளன.

கோவையின் நான்கு புறங்களிலும் 10,20 ஆண்டுகளுக்கு முன்பு கிராமங்களாக இருந்த பகுதிகள் தற்போது மாநகரின் அங்கங்களாக மாறியிருக்கின்றன. புறநகரங்கள் நகருடன் பின்னிப்பிணை யும் அளவுக்கு வளர்ச்சி அடைந்திருக்கின்றன. கடந்த ஆண்டு அரசு வெளியிட்ட அறிவிப்பின் படி இணைக்கப்படும் பகுதிகளையும் சேர்த்தால் நகரின் பரப்பளவு இன்னும் கூடுதலாகும்.

கோவைக்கு புதிய மாஸ்டர் பிளான் அமைக்கப்படும் என்று திமுக கடந்த சட்டப்பேரவைத் தேர்தலில் வாக்குறுதியாக அளித்திருந்தது. இதையடுத்து அரசு, தனியார் நிறுவனங்கள் இதற்கான ஆய்வுகளில் ஈடுபட்டு வந்த நிலையில், கடந்த பிப்ரவரியில் புதிய மாஸ்டர் பிளான் வரைவு வெளியிடப்பட்டது. அதன் மீதான ஆலோசனைகள், ஆட்சேபணைகள் பெறப்பட்டன.

இதையடுத்து, திருத்தங்களுடன் கூடிய 40-க்கும் மேற்பட்ட துறைகளின் ஆலோசனையின் கீழ் இறுதி செய்யப்பட்ட மாஸ்டர் பிளானை முதல்வர் மு.க.ஸ்டாலின் அண்மையில் வெளியிட்டுள்ளார்.