உள்ளாட்சி அமைப்புகளில் நியமனப் பதவிகள் விண்ணப்பங்களை நிரப்ப அரசின் உதவியை எதிர்நோக்கும் மாற்றுத்திறனாளிகள்

உள்ளாட்சி அமைப்புகளில் நியமனப் பதவிகள்

- 

சென்னை, ஜூலை 2: உள்ளாட்சி அமைப்புகளின் நியமனப் பதவிகளுக்கு வரையறுக்கப்பட்ட விண்ணப்பங்களை நிரப்புவதில் மாற்றுத்திறனாளிகள் பெரும் சிரமங்களைச் சந்தித்து வருகின்றனர். எனவே, சட்ட ஆலோசகர்கள் வழியே படிவங்களை நிரப்ப தமிழ்நாடு அரசு உதவ வேண்டும் என கோரிக்கை முன்வைக்கப்பட்டுள்ளது.

தமிழ்நாடு உள்ளாட்சி அமைப்புகள் சட்டத் திருத்தத்தின்படி, மாற்றுத்திறனாளி நபர்களிடமிருந்து பேரூராட்சி, நகராட்சி, மாநகராட்சி மன்றங்களுக்கு உறுப்பினராக நியமனம் செய்வதற்கான விண்ணப்பப் படிவங்களை தமிழ்நாடு அரசு கோரியுள்ளது. பெருநகர சென்னை மாநகராட்சி, பிற மாநகராட்சிகள், நகராட்சிகளுக்கு தனித்தனியாக விண்ணப்பங்களை பதிவிறக்கம் செய்து பூர்த்தி செய்ய வேண்டும்.

விண்ணப்பப் படிவங்களை பூர்த்தி செய்து அளிக்கும் நடைமுறைகள் கடந்த 1-ஆம் தேதி முதல் தொடங்கியுள்ளன. ஜூலை 17-ஆம் தேதிக்குள் பூர்த்தி செய்யப்பட்ட விண்ணப்பங்களை சம்பந்தப்பட்ட நகராட்சி, மாநகராட்சி ஆணையரிடம் நேரடியாகவோ அல்லது தபால் மூலமாகவோ அளிக்க வேண்டும் என்று தமிழக அரசு கேட்டுக் கொண்டுள்ளது.