ரசாயன தொழிற்சாலையில் தீ விபத்து: நான்கு பேர் உயிரிழப்பு; மூவர் படுகாயம்

தில்லியில் உள்ள ரோஹிணியின் ரித்தாலா பகுதியில் உள்ள ஒரு ரசாயனத் தொழிற்சாலையில் ஏற்பட்ட தீ விபத்தில் நான்கு பேர் உயிரிழந்தனர்.

- 

புது தில்லி, ஜூன் 25: மேலும், குறைந்தது மூன்று பேர் காயமடைந்தனர் என்று போலீஸார் புதன்கிழமை தெரிவித்தனர்.

ரோஹிணி செக்டார்-5 பகுதியில் உள்ள ஐந்து மாடி கட்டடத்தில் செவ்வாய்க்கிழமை தீ விபத்து ஏற்பட்டது. மேலும், தீயை அணைக்க 16 தீயணைப்பு வாகனங்கள் அனுப்பிவைக்கப்பட்டன.

ரித்தாலா மெட்ரோ நிலையம் அருகே அமைந்துள்ள வளாகத்தில் இருந்து இந்தச் சம்பவம் பதிவாகியதாக தில்லி தீயணைப்புத் துறைத் தலைவர் அதுல் கார்க் தெரிவித்தார்.

இது குறித்து தில்லி காவல் துறை உயரதிகாரி கூறியதாவது: தீ விபத்துக்கான காரணம் இன்னும் கண்டறியப்படவில்லை. விசாரணை நடந்து வருகிறது. இதுவரை நான்கு எரிந்த உடல்களை போலீஸார் மீட்டுள்ளனர்.