சின்னர் - ஜோகோவிச் பலப்பரீட்சை

டென்னிஸ் காலண்டரின் 2-ஆவது கிராண்ட்ஸ்லாம் போட்டியான பிரெஞ்சு ஓபன் அரையிறுதியில், உலகின் நம்பர் 1 வீரரான இத்தாலியின் யானிக் சின்னர், 24 முறை கிராண்ட்ஸ்லாம் சாம்பியனான செர்பியாவின் நோவக் ஜோகோவிச் பலப்பரீட்சை நடத்தவுள்ளனர்.

- 

பாரீஸ், ஜூன் 5:

ஆடவர் ஒற்றையர் காலிறுதிச் சுற்றில், சின்னர் 6-1, 7-5, 6-0 என்ற நேர் செட்களில், கஜகஸ்தானின் அலெக்ஸாண்டர் பப்லிக்கை 1 மணிநேரம், 48 நிமிஷங்களில் வீழ்த்தினார். கிராண்ட்ஸ்லாம் போட்டிகளில் 6 முறை அரையிறுதிக்கு முன்னேறிய முதல் இத்தாலிய வீரர் என்ற பெருமையை அவர் பெற்றுள்ளார்.

பிரெஞ்சு ஓபனில் சின்னர் அரையிறுதி வரை வந்ததே அதிகபட்சமாக இருக்க, 2-ஆவது முறையாக அவர் அந்தக் கட்டத்தை எட்டியிருக்கிறார். கடந்த ஆண்டும் இந்தப் போட்டியில் அரையிறுதிக்கு வந்த அவர், அல்கராஸிடம் அதில் தோல்வி கண்டார்.