குடமுழுக்கும் அறநிலையத் துறையும்!

டி.எஸ்.ஆர்.வேங்கட ரமணா

- 

கார்ல் மார்க்ஸ் ‘மதம் என்பது வெகு ஜனங்களின் லாகரி வஸ்து’ என்று கூறியது கிட்டத்தட்ட உண்மை ஆகிவிட்டதோ? ‘கடவுள் இல்லை, இல்லை, இல்லவேயில்லை’ என்று ஆரம்பித்த திராவிட இயக்கம், ‘ஒன்றே குலம் ஒருவனே தேவன்’ என உருமாறி, இன்று திராவிட மாடல் ஆட்சியில் 4,000 கோயில்களுக்கு மேல் நாங்கள் குடமுழுக்கு செய்து விட்டோம் என பெருமையடிக்குமளவு பரிணாம வளர்ச்சியடைந்திருக்கிறது. ஆனால், இவை ஒன்றுக்குக் கூட அரசு ஒரு காசு செலவழிக்கவில்லை.

இப்படித்தான், தென்காசி லோகநாயகி சமேத காசி விஸ்வநாத சுவாமி திருக்கோயில் கும்பாபிஷேகம் 07.04.2025-இல் விமரிசையாக நடைபெற்றது. குடமுழுக்கு என்று அறிவித்துவிட்டாலே எல்லைகளைத் தாண்டி, நாடுகளைத் தாண்டி பக்தர்கள் பல லட்சங்களைக் குவிக்கிறார்கள். இதற்கு அடிப்படை காரணம் பக்தர்களின் தர்ம மனப்பான்மையும், பக்தியும் மட்டுமல்ல; கோயிலின் வீர்யமும், சக்தியும் காரணிகளாகும்.

‘கடவுள் இல்லை, இல்லை, இல்லவே இல்லை’ என்ற கருத்தியல் இன்று ஏற்பட்டதல்ல. ஹிந்து மதம் துவங்கிய காலத்தில் இருந்து, குறிப்பாக ஆதிசங்கரர் வரலாற்றுடன் அந்த கருத்தியல் இன்றுவரை பயணிக்கிறது.

முன்பு ஒருமுறை தென்காசி வந்த அன்றைய அமைச்சர் ராஜாராம், சிவந்தி ஆதித்தன் கட்டிய கோபுரத்தை பார்க்க வேண்டும் என்று என்னிடம் சொன்னார். ‘ராமசாமி நாயக்கரின் சீடனாக இருந்த நீங்களா கோயிலுக்குப் போக வேண்டும் என்று சொல்கிறீர்கள்’ என ஆச்சரியப்பட்டேன். அவர் சிரித்தபடியே சொன்னார், “கடவுள் இல்லை என்று டி.எஸ்.ஆர்.வேங்கடரமணா சொன்ன போது எனக்கு வயது 26; இன்று எனக்கு வயது 62, வா கோயிலுக்குப் போகலாம்” என்றார்.