அமெரிக்க பொருள்கள் மீதான வரியை இந்தியா குறைக்கும்: டிரம்ப் நம்பிக்கை

அமெரிக்க பொருள்கள் மீதான வரியை இந்தியா குறைக்கும் என நம்புகிறேன் என்று அமெரிக்க அதிபர் டொனால்ட் டிரம்ப் நம்பிக்கை தெரிவித்தார்.

- 

நியூயார்க், மார்ச் 20: 'அமெரிக்க பொருள்கள் மீதான வரியை இந்தியா குறைக்கும் என நம்புகிறேன்' என்று அமெரிக்க அதிபர் டொனால்ட் டிரம்ப் நம்பிக்கை தெரிவித்தார்.

இந்தியா மீது வரும் ஏப்ரல் 2-ஆம் தேதி முதல் பரஸ்பர வரி விதிப்பு தொடங்கும் என்று அதிபர் டிரம்ப் ஏற்கெனவே அறிவித்துள்ள நிலையில், அமெரிக்காவின் நியூயார்க் நகரில் பிரீட்பார்ட் செய்திச் சேனலுக்கு புதன்கிழமை அளித்த பேட்டியில் இந்தக் கருத்தை அவர் தெரிவித்துள்ளார்.

இதுதொடர்பாக அவர் கூறியதாவது:

இந்தியாவுடன் அமெரிக்கா நல்லுறவை கொண்டுள்ளது. ஆனால், ஒரே பிரச்னை அமெரிக்க பொருள்களுக்கு உலக நாடுகளிலேயே அதிக வரி விதிக்கும் நாடாக இருப்பதுதான்.

அமெரிக்க பொருள்கள் மீதான வரி விதிப்பை இந்தியா கணிசமாக குறைக்கும் என நம்புகிறேன். அதே நேரம், ஏற்கெனவே அறிவித்தபடி வரும் ஏப்ரல் 2-ஆம் தேதி முதல் இந்தியா விதிக்கும் வரிக்கு இணையான வரி விதிப்பை அமெரிக்காவும் நடைமுறைப்படுத்தும் என்றார்.