ரயில்வே பணிக்கு நிலம் லஞ்சமாக பெற்ற வழக்கு: அமலாக்கத் துறை முன் ராப்ரி தேவி ஆஜர்

லாலு இன்று ஆஜராக அழைப்பாணை

- 

பாட்னா, மார்ச் 18: ரயில்வே வேலைக்கு நிலத்தை லஞ்சமாகப் பெற்ற வழக்கு தொடர்பான விசாரணைக்காக பிகார் முன்னாள் முதல்வர் ராப்ரி தேவி, அவரது மகனும் பிகார் எம்எல்ஏ-வுமான தேஜ் பிரதாப் யாதவ் ஆகியோர் அமலாக்கத் துறை அதிகாரிகள் முன் செவ்வாய்க்கிழமை ஆஜராகினர்.

தனது மூத்த மகளும் எம்.பி.யுமான மிஸா பார்தியுடன் பிகார் மாநிலம் பாட்னாவின் பேங்க் சாலையில் அமைந்துள்ள அமலாக்கத் துறை அலுவலகத்துக்கு விசாரணைக்காக ராப்ரி தேவி வந்தார். அப்போது, ராஷ்ட்ரீய ஜனதா தள கட்சி தொண்டர்கள் ஏராளமானோர் அங்கு கூடியிருந்தனர்.

அவரைத் தொடர்ந்து, சில நிமிஷங்களுக்குப் பிறகு தேஜ் பிரதாப் யாதவ் விசாரணைக்கு ஆஜரானார்.

இந்த வழக்கில் ராப்ரி தேவியின் கணவரும் முன்னாள் ரயில்வே அமைச்சரமும் ராஷ்ட்ரீய ஜனதா தளம் தலைவருமான லாலு பிரசாத் (76), புதன்கிழமை (மார்ச் 19) விசாரணைக்கு ஆஜராக அமலாக்கத் துறை சார்பில் அழைப்பாணை அனுப்பப்பட்டது. எனவே, அவர் விசாரணைக்கு புதன்கிழமை ஆஜராவார் என எதிர்பார்க்கப்படுகிறது.