நீர்நிலைகளை பாதுகாக்க நகரும் கழிவு அகற்றும் கருவி

கடந்த காலங்களில் கல்லூரிப் படிப்பை துவங்கும்போது தான் ஆராய்ச்சிகளும், கண்டுபிடிப்புகளும் துவங்கியது. ஆனால், இது மிகவும் காலதாமதம். அதற்கு முன்னதாகவே, பள்ளிப்பருவத்திலேயே கண்டுபிடிப்புகளுக்கான திறனும், ஆராய்ச்சி யுக்திகளும் மனதில் ஏற்பட வேண்டும். அறிவியல் தொழில்நுட்பம் வேகமாக வளர்ந்து வரும் இன்றைய காலகட்டத்தில் பள்ளி பருவத்திலேயே மாணவர்கள் தங்களது திறமைகளை நிரூபிக்க வேண்டிய அவசியம் ஏற்பட்டுள்ளது. புத்தகங்களை தாண்டி அறிவு தேடல், கண்டுபிடிப்பு ஆகியவற்றில் திறமையான மாணவர்களை கண்டுபிடித்து அவர்களை இளம் விஞ்ஞானிகளாக மாற்றுவது அவசியம். அதற்கேற்றார்போல் தற்போது பள்ளி மாணவர்களின் கண்டுபிடிப்புகள் பல்வேறு தரப்பினரிடையே வியப்பை ஏற்படுத்துகிறது. அப்படிப்பட்ட கண்டுபிடிப்புகளில் ஒன்று தான் நீர்நிலையை சுத்தம் செய்ய உதவும் தூய்மை கருவி. நெல்லை மாவட்டத்தை சேர்ந்த வி.கே.புரம் பள்ளி மாணவர்கள் இதை கண்டுபிடித்து அசத்தியுள்ளனர்.

- 

நமது பூமியின் மேற்பரப்பு சுமார் 510 லட்சம் சதுர கிலோ மீட்டர் பரப்பளவு கொண்டது. இதில் சுமார் 361 லட்சம் சதுர கிலோமீட்டர் பரப்பு கடல். இத்துடன் ஒப்பிடும் போது மற்ற நீர் இருப்பை கணக்கிட்டால் வெகு சொற்பம்தான். உலகின் மொத்த நீர் இருப்பில் 97 சதவீதம் கடல். 2.7 சதவீதம் பனிக்கட்டியாகவும், 0.3 சதவீதம் மட்டுமே நதிகள், ஏரி, குளங்கள், நிலத்தடி நீர்மட்டமாக உள்ளது.

இந்த சொற்ப நீரை நம்பித்தான் உலக உயிரினங்கள் அனைத்தும் இயங்கி வருகின்றன. இந்த நீர்நிலைகளும் சமீப காலமாக வளர்ச்சி என்ற ஒற்றைச் சொல்லை காட்டி அசுத்தப்படுத்தப்பட்டு வருகிறது. ஆறுகள், குளங்கள், கால்வாய்கள் என அனைத்து இடங்களிலும் ஆகாயத்தாமரை என்ற அசுர செடியும், மக்களால் தூக்கி வீசப்படும் பிளாஸ்டிக், குப்பை கழிவுகளும் நிரம்பி கிடக்கின்றன. இதனால் நீர்நிலைகள் மாசுபட்டு புதிய புதிய கிருமிகள் உருவாகி மக்களின் உயிரோடு விளையாடி வருகின்றன. எனவே நீர்நிலைகளை பாதுகாப்பது அரசுக்கு பெரும் சவாலான விஷயமாக மாறி வருகிறது.